Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 436 Hüküm no: 517 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lembiye’nin ölmeden önce Todori’ye verdiği borcun ödendiği Ma‘rûz Şahsı ta‘rîf-i şer‘î ile mu‘arrefe olan Lembiye nâm Nasrâniye meclis-i şer‘de kezâlik şahsı ta‘rîf-i şer‘î ile mu‘arrefe olan sâhibe-i arzuhâl Ezmerağda bt. Mihalaki nâm Nasrâniye muvâcehesinde bundan akdem mesfûre Ezmerağda’nın zevci Todori nâm hâlik hayâtında vasiyesi olduğum evlâd-ı sıgārımın mâlları olmak üzere yedimden istidâne ve kabz eylediği yüz on guruşu kable’l-edâ hâlik olmağla vâzı‘atü’l-yed olduğu tereke-i vâfiyesinden bana edâya mesfûre Ezmerağda’ya tenbîh olmak matlûbumdur deyü da‘vâ ol dahi ikrâr lâkin hâlik-i mesfûr hayâtında sekiz senede bilâ-devr-i şer‘î ribh nâmına müdde‘iye-i mezbûrenin yedine teslîm eylediği cem‘an doksan altı guruşu asl-ı mâlın ol mikdârına takas ederim deyü doksan altı guruşunu ba‘de’d-def‘ mezbûre Lembiye meblağ-ı mezbûr doksan altı guruşu ber-vech-i muharrer ahzını ikrâr lâkin hâlik-i mezbûrun hayâtında emriyle mesârif-i sıgāra sarf eyledim deyüp def‘-i mezkûrunu def‘ ile ba‘de’l-mukābele ve inkâr def‘-i mezkûrunu mesfûre Lembiye isbâta kādire olmayıp mûcebince meblağ-ı mezbûr yüz on dört guruşundan mâ‘adâsı olan doksan altı guruş talebiyle müdde‘iye-i mesfûre Lembiye bilâ-beyyine bî-vech-i şer‘î mu‘ârazadan men‘ olunduğu Bâb Mahkemesi’nde ba‘de’t-tescîl huzûr-ı âlîlerine i‘lâm olundu. El-emru li-men-lehü’l-emr. Hurrire fî 13 min-Muharremi’l-harâm sene 1153.