Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 338 Hüküm no: 491 Orijinal metin no: [73a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsrail v. Asbah’ın rakı bahasından alacağı olduğu İşbu bâ‘isü’r-rakīm İsrail v. Asbah nâm Yahûdi meclis-i şer‘-i şerîfde meyhâneci tâifesinden Üstüyo v. İstanco nâm zimmî muvâcehesinde üzerine da‘vâ ve takrîr-i kelâm edip mezbûr Üstüyo zimmetinde yedimden müşterâ ve makbûz her müdresi yüz akçeye olmak üzere yüz otuz medre rakı bahâsından on üç bin akçe hakkım olup meblağ-ı mezbûrdan beş bin akçesini ahz u kabz edip bakī sekiz bin akçesini taleb ederim suâl olunsun dedikde gıbbe’s-suâl mezbûr Üstüyo cevâbında fi’l-vâki‘ müdde‘î-i mezbûra cihet-i mersûmeden zimmetimde sekiz bin akçe lâzımü’l-edâ ve vâcibü’l-kazâ deynim vardır deyü ikrâr u i‘tirâf edip mûcebince meblağ-ı mezbûr sekiz bin akçenin edâsı’çün mezbûr Üstüyo’ya tenbîh olunup mâ-hüve’l-vâki‘ gıbbe’t-taleb ketb olundu. Tahrîren fi’l-yevmi’l-âşir min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: İbrahim Çelebi [b.] Davud, Rıdvan b. Abdullah, Halil Beşe çukadâr, Pîrî b. Hüseyin ve gayruhum.