Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 338 Hüküm no: 492 Orijinal metin no: [73a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Beşe’nin evini istiğlâl yoluyla sattığı Vilâyet-i Anadolu’da İznikmid kazâsına tâbi‘ Değirmenderesi karyesinde sâkin Mahmud Beşe b. Ali nâm kimesne meclis-i şer‘de Galata kazâsı muzâfâtından kasaba-i Kasımpaşa’da vâki‘ merkūme Meryem Hatun vakfeylediği nukūda bi’l-fi‘il mütevellî olan işbu râfi‘u’l-kitâb eş-Şeyh Mustafa Efendi [b.] Ali nâm kimesne mahzarında ikrâr ve takrîr-i kelâm edip karye-i mezbûrede vâki‘ bir tarafdan Hemsaboğlu demekle ma‘rûf Mustafa Beşe’nin veresesi mülkleri ve bir tarafdan karındaşım Hüseyin nâm müteveffânın veresesi mülkleri ve bir tarafdan Pîrî Mehmed bağı ve bir tarafdan tarîk-i âm ile mahdûd bir bâb fevkānî ve bir bâb tahtânî odaları ve kilârı ve sofayı ve hadîka-i zât-ı eşcâr-ı müsmire ve gayr-ı müsmireyi müştemil olan mülk menzilimi mütevellî-i merkūm eş-Şeyh Mustafa Efendi’ye yüz yirmi beş kıt‘a riyâlî guruş-ı kebîre bey‘ edip ol dahi mâl-ı vakf-ı mezbûr ile bi-tarîkı’l-istiğlâl iştirâ ve kabûl eyledikden sonra meblağ-ı mezbûru merkūm Mustafa Efendi yedinden tamamen ahz u kabz edip menzil-i merkūmu mahallinde kabz ve tesellüme müteveffâ-i mezbûru taslît eyleyip ol dahi varıp tesellüm ve kabz eyledikden sonra menzil-i mezbûru mütevellî-i merkūmdan târîh-i kitâb senesi Zilka‘deti’ş-şerîfesi gurresinde bir sene tamamına değin on iki buçuk riyâlî guruşa istîcâr edip ol dahi minvâl-i meşrûh üzere bana îcâr eyledi dedikde gıbbe’t-tasdîkı’ş-şer‘î menzil-i mezbûrun derkine ve ücret-i merkūmeye işbu hâzır bi’l-meclis el-Hâc İshak b. Ali kefâlet-i sahîha ile kefîl olmağın mâ-vaka‘a bi’t-taleb ketb olundu. Fi’l-yevmi’l-hâdî aşer min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Ramazan Efendi b. Mustafa, Mehmed b. Ali, Mehmed Çelebi b. Hüseyin, Ebûbekir Dede b. Hasan, Halil Beşe çukadâr, es-Seyyid Mustafa [b.] Ahmed ve gayruhum.