Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 440 Hüküm no: 524 Orijinal metin no: [68a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Voynuk Şücâ mahallesi ahalisinin imamları Mustafa Efendi’den şikâyetçi olup yerine Mehmed Bahtî Efendi’nin tayinini istedikleri Bâ-mühr-i efendi Ma‘rûz-ı dâ‘î İstanbul’da Voynuk Şücâ‘ mahallesi ahâlîsinde ashâb-ı arzuhâl el-Hâc Mustafa Efendi ve el-Hâc Abdullah Efendi ve el-Hâc Halil ve Mustafa ve el-Hâc Abdullah ve Mahmud ve Hüseyin ve İbrahim ve Süleyman ve es-Seyyid Süleyman ve Yusuf Ağa ve Salih ve Mehmed ve es-Seyyid Mehmed ve el-Hâc Mehmed ve el-Hâc Ali ve İbrahim ve Hüseyin ve es-Seyyid Ahmed ve Abdülgafur ve Ömer Beşe ve Mehmed Ağa ve Hüseyin ve Mehmed Odabaşı ve Mustafa ve diğer Mustafa ve Hasan ve Ali ve diğer Ali ve Ahmed ve Veliyüddin ve Mehmed ve el-Hâc Abdülkerim ve Hasan ve Hüseyin Ağa ve sâirleri meclis-i şer‘de her biri takrîr-i kelâm edip mahallemiz imâmı Mustafa Efendi imâmetlik hizmetin edâ etmeyip ve fukarâ cenâzesi vâki‘ oldukça gasl ve salâtını kılmayıp ve mükellef cenâzeler vâki‘ oldukda her birinden hudûdundan ziyâde cebren ve kahren ıskāt-ı salât nâmıyla yirmişer ve otuzar guruş getürdüp devretmeksizin kendi cümlesin alıp ve murâdı üzere ıskāt-ı salât vermediklerinde kendi gelmediğinden mâ‘adâ cenâzeleri gasle vekîl göndermeyip ahşama değin kaldığından gayrı mezbûr Mustafa Efendi cümle münkerât ve menhiyyâtı mürtekib ve ehl ü iyâllerimize hilâf-ı şer‘-i şerîf ta‘arruz ve bizleri dahi tekdîr ve ta‘cîz ve rencîde vü remîde etmekle mezbûr Mustafa Efendi’den bir vechile hoşnûd ve râzılar olmamağla emniyet ve râhatımız yokdur deyü ba‘de’t-teşekkî mezbûr Mustafa Efendi imâmetlikden azlolunup yeri mahallemiz ahâlîsinden olup cümlemizin muhtârı olan işbu hâzır bi’l-meclis Mehmed Bahtî Efendi b. Osman dâ‘îlerine tevcîh ve yedine berât-ı âlîşân sadaka ve ihsân buyrulmak ricâsında oldukları huzûr-ı âlîlerine i‘lâm olundu. Bâkī emr ü fermân hazret-i veliyyü’l-emrindir. Fî 14 min-Muharremi’l-harâm sene 1153.