Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 440 Hüküm no: 525 Orijinal metin no: [68a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Dimitri’nin vefat eden Râbia Hatun’dan alacağı konusundaki davanın sulh ile sonuçlandığı Ma‘rûz Sâhib-i arzuhâl Keresteci Dimitri meclis-i şer‘de bundan akdem müteveffiye olan Şirinigâr nâm-ı diğer Râbia nâm hatunun veresesinden sadriye kebîre kızı Fâtıma tarafından sâbitü’l-vekâle vekîli olan Hüseyin Efendi muvâcehesinde müteveffâ-yı mezbûrenin zimmetinde hayâtında yedimden iştirâ ve kabz eylediği kereste semeninden hakkım olan yüz elli guruşu kable’l-edâ vefât edip tereke-i vâfiyesini müvekkile-i mezbûre ve verese-i sâiresi kabz etmekle hâlâ meblağ-ı mezbûrdan müvekkile-i mezbûrenin hissesine isâbet eden yetmiş beş guruşu taleb ederim deyü eylediğim da‘vâmdan on beş guruş bedel-i makbûza vekîl-i mezbûr ile ber-vech-i şer‘î sulh olup husûs-ı mezbûra müte‘allıka da‘vâdan müvekkile-i mezbûre Fâtıma’nın zimmetini ibrâ ve ıskāt eyledim deyü ikrâr vekîl-i merkūm dahi tasdîk edip kat‘-ı nizâ‘ eyledikleri Bâb Mahkemesi’nde ba‘de’t-tescîl huzûr-ı âlîlerine i‘lâm olundu. Fî 15 min-Muharrem sene 1153.