Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 443 Hüküm no: 532 Orijinal metin no: [68b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi’nin hamile karısı Sofya’nın karnına vurup düşük yapmasına sebep olan Kömürcü Ohan’ın firar ettiği Ma‘rûz Sâhib-i arzuhâl Yorgi zimmînin hasmı arzuhâlde ismi mezkûr Ohan zimmî kable’l-mürâfa‘a firâr ve gaybet eylediği cerîdede isimleri mastûr bî-garaz Müslimîn ihbârlarıyla müte‘ayyen oldukdan sonra mesfûr Yorgi zimmî iltimâsıyla istikşâf-ı hâl için cânib-i şer‘-i hatîr-ı lâzımü’t-tevkīrden irsâl olunan Başkâtib La‘lîzâde Efendi dâ‘îleri mesfûr Yorgi zimmînin İstanbul’da Baklalı mahallesinde mütemekkin olduğu menzile varıp huzûr-ı Müslimînde akd eylediği meclis-i şer‘de mesfûrun zevcesi Sofya bt. Dardor Nasrâniyeyi gāib-i merkūm Kömürcü Ohan zimmî târîh-i i‘lâmdan beş gün mukaddem menzil-i mezkûra girip hâmile olduğu halde batnına darb eylediğini hâzırûn bi’l-meclis Müslimîn haber verdiklerinden sonra mesfûre Sofya Nasrâniye darb-ı mezkûrdan nâşî üç gün mürûrunda sekiz aylık mütebeyyinü’l-uzuv bir dişi ilkā eylediği meyyiti Müslimîn-i mezkûrîn ile ba‘de’l-keşf meyyit-i mezkûreyi zîr-i hâke ilkāya mesfûr Yorgi zimmîye tenbîh eylediğini mahallinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihi inhâ eyleyip lâkin firâr ve gaybet eden mesfûr Kömürcü Ohan bulunup sâhib-i arzuhâl mesfûr Yorgi ile vech-i şer‘î üzere mürâfa‘aya muhtâc olduğu huzûr-ı âlîlerine i‘lâm olundu. El-emru li-men-lehü’l-emr. Fî 17 min-Muharremi’l-harâm sene 1153.