Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 447 Hüküm no: 540 Orijinal metin no: [69a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üzerinden on beş sene geçen davalara bakılmadığı Ma‘rûz İstanbul’da Veled-i Karabaş mahallesi ahâlîsinden olup bundan akdem vefât eden Hüseyin b. İbrahim b. Abdullah’ın verâseti zevce-i metrûkesi olup derûn-ı arzuhâlde isimleri mastûr Meryem bt. Mehmed nâm hatun ile sulbî kebîr oğlu Mehmed ve sulbiye kebîre kızları Hadîce ve Fâtıma nâm hatunlara inhisarından sonra zevce-i mezbûre Meryem Hatun ile mezbûr Mehmed ve mezbûre Hadîce Bâb Mahkemesi’nde meclis-i şer‘de zikri câî menzile vâzı‘u’l-yed olan sâhib-i arzuhâl Halil b. Hasan mahzarında mahalle-i mezbûrede vâki‘ iki tarafdan merkūm Halil Çelebi mülkü ve iki tarafdan tarîk-i âm ile mahdûd fevkānî iki bâb oda ve bir sofa ve tahtânî bir matbah ve kenîf ve müşterek bi’r-i mâ ve bir mikdâr havluyu müştemil mülk menzilin arsası mûrisimiz müteveffâ-yı mezbûrun vâlidesi müteveffiye-i mezbûre Âişe Hatun’un yedinde mülkü olduğu hâlde mûrisimiz müteveffâ-yı mezbûr Hüseyin hayâtında târîh-i i‘lâmdan yirmi üç sene mukaddem zikr olunan arsa üzerine ebniye-i mezkûreyi kendi mâlı ile binâ ve ihdâs edip mûrisimiz mezbûr Hüseyin dahi on altı sene mukaddem vefât etmekle ebniye-i mezkûre bize mevrûs olmağla ebniye-i mezkûreyi merkūm Halil’den taleb ederiz deyü her biri da‘vâya tasaddî etmeleriyle müdde‘iyûn-ı mezbûrûnun takrîrleri üzere bilâ-özr-i şer‘î on beş sene terk olunan da‘vânın bilâ-emr-i sultânî istimâ‘ından hükkâm-ı şer‘ memnû‘lar olmağın mûcebince müdde‘iyûn-ı mezbûrûn Mehmed ve Meryem ve Hadîce bî-vech mu‘ârazadan men‘ olundukları tescîl olunmuşdur. Bâkī fermân men-lehü’l-emrindir. Fî 21 min-Muharrem sene 1153.