Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 449 Hüküm no: 544 Orijinal metin no: [69b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin Gürcü asıllı olduğunu sanarak aldığı Emine’nin aslında hür olduğu anlaşıldığından azat edildiği Ma‘rûz Sâbıkā rıkkiyetini mu‘terife ve ber-vech-i âtî da‘vâya kıbel-i şer‘den me’zûne olan orta boylu, kara kaşlı, kara gözlü, Müslimetü’l-millet Emine bt. Ali meclis-i şer‘de kendüye rakīkası olmak üzere vaz‘-ı yedi mütehakkık olan fahrü’l-müderrisîni’l-kirâm Ahmed Efendi b. Mehmed Emin Efendi b. Mehmed’in vekîl-i sâbitü’l-vekâlesi Mustafa Efendi mahzarında İneada? ahâlîsinden Ali b. Abdullah nâm hürretü’l-aslın firâşından hâsıl ve zevcesi Saime bt. Abdurrahman nâm hürretü’l-asldan mütevellide olup bana ve ebeveynime kat‘an [rı]k târî olmamış hürretü’l-asl iken müvekkil-i mûmâ-ileyh rakīkası olmak zu‘muyla bi-gayr-ı hakkın vaz‘-ı yed etmekle suâl olunup sebîlim tahliye ve müvekkil-i mûmâ-ileyhin kasr-ı yedine tenbîh olunmak matlûbumdur deyü ba‘de’d-da‘vâ ve’l-istintâk vekîl-i mezbûr cevâbında müvekkilim mûmâ-ileyh mevsûfe-i mezbûreyi medîne-i İzmir’de Mısırlı Halil Kapudan Gürcü cinsinden olmak üzere iki yüz altmış guruş semen-i medfû‘a iştirâ etmiş idi deyü vaz‘-ı yed eylediğini ikrâr ve ber-vech-i muharrer hürriyetini inkâr ettikde mevsûfe-i mezbûre Emine ber-vech-i meşrûh müdde‘âsını lede’t-tezkiye adâletleri zâhir olan Ömer b. Mustafa ve Mustafa b. Hüseyin ve Mehmed b. Ahmed nâm kimesneler şehâdetleriyle vekîl-i mezbûr muvâcehesinde vech-i şer‘î üzere isbât etmeğin mûcebince mevsûfe-i mezbûre Emine’nin hürriyetine ba‘de’l-hükm mevsûfe-i mezbûrenin sebîli tahliye ve müvekkil-i mûmâ-ileyhin kasr-ı yedine tenbîh olundukdan sonra müvekkil-i mûmâ-ileyh Ahmed Efendi mevsûfe-i mezbûrenin semeni olan iki yüz altmış guruşu merkūm Halil Kapudan’dan taleb ve da‘vâ ve ahz u kabza ve kendüye îsâl ve teslîme Mustafa Efendi b. Musa’yı tarafından bâ-hüccet-i şer‘iyye tevkîl etmeğin vekîl-i mezbûr Mustafa Efendi medîne-i merkūmede mürâfa‘a-i şer‘ ve ihkāk-ı hak olunmak üzere hükm-i hümâyûn ricâsında olduğu Bâb Mahkemesi’nde tescîl ve huzûr-ı âlîlerine i‘lâm olundu. Bâkīyü’l-emr li-men-lehü’l-emr. Fî 22 Muharremi’l-harâm sene 1153.