Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 449 Hüküm no: 545 Orijinal metin no: [69b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehir ve nafakasından vazgeçerek Abdullah’dan ayrılan Râbia’nın, mehir talebiyle tekrar dava açamayacağı Bâ-mühr-i efendi Ma‘rûz Sâhibe-i arzuhâl Râbia zâtı ba‘de’t-ta‘rîfi’ş-şer‘î meclis-i şer‘de derûn-ı arzuhâlde mastûrü’l-ism zevc-i sâbıkı Abdullah’ın vekîl-i sâbitü’l-vekâlesi el-Hâc Ömer muvâcehesinde târîh-i i‘lâmdan on dokuz gün mukaddem zevcim müvekkil-i mezbûrun zimmetinde mütekarrer ve ma‘kūdün-aleyh olan yirmi beş guruş mehr-i müeccelim ve nafaka-i iddetim ve meûnet-i süknâm dahi kendi üzerime olmak üzere zevcim mezbûr ile ber-nehc-i şer‘î hul‘ olduğumda ol dahi hul‘-i mezbûru ba‘de’l-kabûl âmme-i da‘vâdan zevcim mezbûrun zimmetini ibrâ ve ıskāt etmiş idim, el-hâletü hâzihi ber-vech-i muharrer hul‘ ve ibrâma nâdime oldum, mehr-i mezkûrum ile nafaka-i iddetimi taleb ederim deyü eylediği da‘vâsı lağv olmağla mezbûre Râbia bi-gayr-ı vechin mu‘ârazadan men‘ olunduğu huzûr-ı âlîlerine i‘lâm olundu. Fî 22 min-Muharremi’l-harâm sene 1153.