Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 450 Hüküm no: 547 Orijinal metin no: [69b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa ve Ali’den taleb edilen firar etmiş olan arkadaşları, eşkıyadan İbrahim ve Mehmed’le alakalı davanının kabul edilmediği Ma‘rûz Davud Paşa Mahkemesi’nde olan i‘lâmda mastûrü’l-ism Feyzullah Efendi ve Ali ve İbrahim taraflarından mahkeme-i merkūmede ber-nehc-i şer‘î vekâleti sâbit olan İmâm el-Hâc Mustafa Efendi Bâb Mahkemesi’nde Mumcu el-Hâc Mustafa Beşe mübâşeretiyle meclis-i şer‘a ihzâr ettirdiği mezbûrûn Feyzullah ve Ali ve İbrahim’in râkib oldukları sefînenin mâliki olup kendi İstanbul’da sâkin olan Mustafa ile sefînesinde reis olan Ali muvâcehelerinde işbu yedimde olan mahkeme-i mezkûre nâibi Ahmed Efendi hâtemiyle mahtûm i‘lâmda tafsîl ve isbât olunduğu vech üzere i‘lâm-ı mezkûrda eşkıyâdan olmak üzere isimleri mastûr İbrahim b. Ali ve Mehmed b. Hasan ile hâlâ firâr ve gaybet eden isimleri ma‘lûmum olmayan iki nefer şakīlerin mezbûrân İbrahim ve Mehmed refîkleri olmağla gāibân-ı mezbûrânı merkūmân Mustafa ve Ali’den taleb ederim deyü bi’l-vekâle tasaddî eylediği da‘vâsı meşrû‘ olmamağla vekîl-i mezbûrun da‘vâsına iltifât olunmadığı huzûr-ı âlîlerine i‘lâm olundu. Fî 23 min-Muharremi’l-harâm sene 1153.