Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 452 Hüküm no: 551 Orijinal metin no: [70a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Süleyman Efendi Vakfı’na ait iki dükkân üzerindeki nizaın, Haffaf Abdullah’a ve Nalçacı Mehmed’e kiralanmasıyla sona erdiği Ma‘rûz Derûn-ı arzuhâlde mezkûr dükkân nizâ‘ı için kıbel-i şer‘den irsâl olunan keşif nâibi Hıfzı el-Hâc Mehmed Efendi dâ‘îleri hâssa mimârlarından Mustafa ve Halil Halîfeler ile İstanbul’da Balatkapısı dâhilinde defterdâr-ı sâbık Kara Süleyman Efendi Vakfı’ndan haffâf ve nalçacı dükkânlarına varıp huzûr-ı Müslimînde akd eylediği meclis-i şer‘de sâhib-i arzuhâl Mehmed Ağa tarafından vekîl-i sâbitü’l-vekâlesi Hüseyin Efendi meclis-i ma‘kūd-ı mezkûrda derûn-ı arzuhâlde mezkûrü’l-ism Haffâf el-Hâc Abdullah ve Nalçacı Mehmed mahzarlarında vakf-ı mezbûr mütevellîsi Hasan Ağa hâzır olduğu halde sâbıku’z-zikr iki bâb dükkânlardan altı hissede dört hissemi müvekkilim mezbûrun ve bir hissesi mezbûr Haffâf el-Hâc Abdullah’ın ve bir hissesi mezbûr Nalçacı Mehmed ber-mûceb-i temessük tasarruflarında olup mârrü’z-zikr haffâf dükkânının dört hissesinde bir hisseye mutasarrıf olan haffâf-ı mezbûr el-Hâc Abdullah beher şehr altmışar paraya ve nalçacı dükkânında olan dört hissesini kezâlik bir hisseye mutasarrıf olan mezbûr Nalçacı Mehmed’e beher şehr birer guruşa işbu bin yüz elli üç senesi Saferi’l-hayr gurresinde bi’l-vekâle mezbûrân el-Hâc Abdullah ve Mehmed’e îcâr onlar dahi istîcâr ve kabûl ve bu vechile kat‘-ı nizâ‘ eyledikleri mevlânâ-yı mezbûr mahallinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihi inhâ ve takrîr eyledikleri huzûr-ı âlîlerine i‘lâm olundu. Fî 23 min-Muharrem sene 1153.