Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 339 Hüküm no: 494 Orijinal metin no: [73b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan bt. Derviş Ali Çelebi’nin vefât eden kocasının terekesinden cevahir ve ev bahasından alacağı olduğu Mahmiye-i İstanbul’da Hoca Hamza Mahallesi’nde sâkine işbu bâ‘isetü’l-kitâb Neslihan bt. Derviş Ali Çelebi nâm hatun mahfil-i şer‘-i hatîr-i lâzımü’t-tevkīrde sadriye kızı olan Âişe bt. Mehmed kethüdâ nâm hatun muvâcehesinde üzerine da‘vâ ve takrîr-i kelâm edip mezbûre Âişe’nin babası ve benim zevcim olan Mehmed kethüdâ zimmetinde beynimizde vasf ve mikdârı ma‘lûm cevâhir bahâsından bin riyâlî guruş ve mahalle-i mezbûrede beyne’l-ahâlî ve’l-cîrân ma‘lûmü’l-hudûd olup müşterâ ve makbûz olan mülk menzilim bahâsından dahi beş yüz guruş cem‘an bin beş yüz guruş-ı kebîr hakkım olup vech-i muharrer üzere zimmetinde bin beş yüz guruş hakkım olduğunu şuhûd mahzarında ikrâr u i‘tirâf eyleyüp yedime müm[z]â ve mahtûm deyn tezkeresi dahi vermiş idi. Lâkin kable’l-istîfâ mezbûr Mehmed kethüdâ müteveffâ olmağın mezbûre Âişe vâzı‘atü’l-yed olduğu tereke-i vâfiyesinden taleb ederim, suâl olunsun dedikde gıbbe’l-inkâr ve’l-istişhâd udûl ve sikātdan Ali Efendi b. Receb el-müderris ve Salih Bey b. Sinan li-ecli’ş-şehâde meclis-i şer‘a hâzırân olup fi’l-hakīka müteveffâ-i mezbûr sıhhati hâlinde bizim huzûrumuzda zevcesi müdde‘îye-i mezbûre Neslihan’a vech-i muharrer üzere yedinden müşterâ ve makbûz olan cevâhir ve menzil bahâlarından bin beş yüz riyâlî guruş-ı kebîr deynim vardır deyü ikrâr [ve] i‘tirâf eyledi, bu husûsa şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûle vusûl buldukdan sonra mezbûre Neslihan’a meblağ-ı mezbûr bin beş yüz guruşdan küllen ve ba‘zan ahz u kabz eyleyip mezbûr Mehmed kethüdânın zimmetini hâl-i sıhhatinde bir tarîk ile ibrâ eylemediğine yemîn teklîf olundukda hasebi’l-mesûl half bi’llâhi’l-aliyyi’l-azîm etmeğin mûcebince tereke-i vâfiye-i müteveffâ-i mezbûreden meblağ-ı mezbûrun edası için merkūme Âişe’ye tenbîh <> olunup mâ-vaka‘a bi’t-taleb sebt [ü] ketb olundu. Fi’l-yevmi’s-sânî aşer min-Zilka‘deti’l-harâm min-şühûr li-sene erba‘a ve sittin ve elf. Şuhûdü’l-hâl: Halil Efendi b. Mustafa el-imâm, Şeyh Mehmed Çelebi b. Musa Efendi, Ali Bey b. Mustafa, Pîrî Bey b. Hüseyin, Mehmed Çelebi b. Hüseyin, İbrahim Çelebi b. Davud ve gayruhum.