Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 340 Hüküm no: 495 Orijinal metin no: [73b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Hasan’ın satılan eşyalar konusunda bir davası olmadığı Hüseyin b. Hasan nâm kimesne meclis-i şer‘-i hatîr-i lâzımü’t-tevkīrde kürkçü tâifesinden işbu hâmilü’l-kitâb Yani v. Lambo nâm zimmî muvâcehesinde ikrâr ve takrîr-i kelâm edip târîh-i kitâbdan bir sene mukaddem hâzır bi’l-meclis Ramazan Bey nâm cündînin hizmetkârı iken hufyeten bir tilki kürk kaplı mâî ferâce ve bir çakmaklı tüfenk ve bir çultar ve yüz elli nakd akçesin ahz u kabz edip mezbûr Yani zimmîye def‘ ve teslîm etmişdi deyip mezbûr Yani’den mutâlebe sadedinde olmuşdur. Lâkin zikrolunan eşyâyı hufyeten ahz edip âhara bey‘ ve semeni kendi mesârifime sarf eyledi, kat‘â mezbûr Yani’ye eşyâ-i mezbûreden bir şey def‘ ve teslîm eylemeyip min-ba‘d da‘vâm dahi yokdur dedikde vâki‘ hâl bi’t-taleb sebt olundu. Fi’s-sâlis aşer min-Zilka‘de li-seneti’l-mezbûre. Şuhûdü’l-hâl: Fahrü’l-akrân Ömer Ağa subaşı, Pîrî Bey b. Hüseyin, İbrahim Çelebi b. Davud, Rıdvan Beşe b. Pîrî, Ömer Çelebi b. Hüseyin ve gayruhum mine’l-huzzâr.