Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 454 Hüküm no: 556 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hatice Hatun’un kocası Molla Mustafa ile varisi Emine Hatun arasındaki davaya sulh bedeli karşılığı son verildiği Sâhib-i arzuhâl Molla Mustafa Mahkeme-i Bâb’da meclis-i şer‘de derûn-ı arzuhâlde mezkûre zevce-i muhteli‘ası müteveffât Hadîce Hatun’un zî-rahm cihetinden vârisesi olmağla bi’l-verâse terekesine vaz‘-ı yed eden Emine Hatun bt. İbrahim mahzarında bundan akdem muhteli‘am müteveffât-ı mezkûre Hadîce Hatun hayâtında benimle ba‘de’l-muhâla‘a yirmi gün mürûrunda tekrâr nefsini huzûr-ı Müslimînde mehr-i müeccel-i ma‘lûme tesmiyesiyle bana tezvîc ettikde ben dahi tezevvüc ve kabûl edip zevce-i menkûham iken mezbûre Hadîce Hatun vefât edip terekesinin nısfı bi’l-ırsi’ş-şer‘î bana isâbet etmekle nısf hisse-i irsiyemi mezbûre Emine Hatun’dan taleb ederim deyü da‘vâ eylediğimde mezbûre Emine Hatun dahi cevâbında mezbûr Molla Mustafa mukaddemâ mahkeme-i şer‘iyyâtda sâbıkā şer‘iyyâtî müderrisîn-i kirâmdan Derviş Mustafa Efendi huzûrunda benim müteveffât-ı mezbûre ile hayâtında ve sahîha olduğu halde mehr-i müecceli ve nafaka-i iddet-i ma‘lûme ve me’ûnet-i süknâsı üzerlerine muhâla‘a olup hukūk-ı zevciyet ve sâire müte‘allıka da‘vâdan her biri âharın zimmetlerini ibrâ etmeleriyle mûrisem talâk-ı bâyin ile mutallaka olmağın vâris olmaz deyü olan def‘imi nâtıka ve mazmûnu sâbit işbu bir kıt‘a muhâla‘a hücceti ile şer‘iyyâtî-i mûmâ-ileyh müdde‘î-i mezbûr Molla Mustafa’yı mu‘ârazadan men‘ etmiş idi deyü müşârün-ileyhin hâtemini hâvî ve mazmûnu min-külli’l-vücûh takrîr-i meşrûhuna mutâbık bir kıt‘a i‘lâm ibrâzıyla ba‘de’d-def‘ ve’l-inkâr mezbûre Emine def‘-i mezkûrunu beyân sadedinde iken beynimizde muslihûn tavassut edip ben da‘vâ-yı mezkûremden mezbûre Emine Hatun ile on beş guruş üzerine sulh olup ve bedel-i sulhü târîh-i i‘lâmdan yüz bir gün tamâmında edâ etmek üzere ba‘de’t-tecîl ve’l-kabûl husûs-ı mezbûra müte‘allıka âmme-i da‘vâdan her birimiz âharın zimmetini ibrâ eyledik deyü takrîri ba‘de’d-tasdîk ve’t-tescîl huzûr-ı âlîlerine i‘lâm olundu. Fî 24 min-Muharrem sene 1153.