Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 455 Hüküm no: 557 Orijinal metin no: [70b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Hasan’ın zorla parasını alan Abbas Bölükbaşı’nın parayı teslim etmesi Rumeli’de Peremedi kazâsına tâbi‘ Preştani nâm karye ahâlîsinden sâhib-i arzuhâl Ali b. Hasan, Kullukcu Osman Beşe mübâşeretiyle Bâb Mahkemesi’ne ihzâr ettirdiği derûn-ı arzuhâlde mezkûrü’l-ism Abbas Bölükbaşı b. Şa‘bân mahzarında târîh-i i‘lâmdan yirmi iki ay mukaddem mezbûr Abbas Bölükbaşı karye-i mezbûreye gelip Murtaza Bey nâm kimesnenin odasında beni on gün habs ve yüz cedîd guruş ve elli guruşluk para cem‘an yüz elli guruşumu bi-gayr-ı hakkın ahz u kabz etmekle meblağ-ı mezbûru merkūm Abbas Bölükbaşı’dan taleb ederim deyü da‘vâ eyledikde ol dahi inkâr etmeğin müdde‘î-i mezbûr ber-vech-i muharrer müdde‘âsını lede’t-tezkiye şehâdetleri makbûle olan kazâ-i mezbûr ahâlîsinden olup İstanbul’da müsâfiren sâkinler Mehmed b. Hasan ve İsmail b. Hüseyin şehâdetleriyle merkūm Abbas Bölükbaşı muvâcehesinde vech-i şer‘î üzere isbât etmeğin mûcebince mezbûr yüz elli guruşu müdde‘î-i mezbûr Ali’ye edâ ve teslîme merkūm Abbas Bölükbaşı’ya tenbîh olundu, huzûr-ı âlîlerine i‘lâm olundu. Fî 26 min-Muharrem sene 1153.