Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 456 Hüküm no: 558 Orijinal metin no: [70b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karadeniz tarafından gelen kereste gemilerinin sadece Çöplük İskelesi’ne mallarını indirmeleri, kefere gemilerine veya muhtekir mahzenlerine kereste indirmenin yasak olduğu Bâ-mühr-i efendi Keresteciler nizâmı i‘lâmıdır Ma‘rûz Sâdır olan fermân-ı âlîlerine imtisâlen cânib-i şer‘-i hatîrden ba‘s olunan keşif nâibimiz Hıfzı el-Hâc Mehmed Efendi dâ‘îleri ser-mimârân-ı hâssa el-Hâc Mehmed Ağa kulları ile Âsitâne-i sa‘âdetde vâki‘ gümrük-i âmireye varıp gümrük-i mezbûr emîni fahrü’l-emâcid ve’l-a‘yân es-Seyyid İshak Ağa hâzır olduğu halde cerîdede mazbûtü’l-esâmî Müslimîn huzûrlarında meclis-i şer‘-i şerîf-i âlî-kadrde Mısr-ı Kāhire kalyonu kapudanlarından Suhte el-Hâc Halil ve Kurbağızâde el-Hâc Cum‘a ve Boğazlı İsmail ve Abdullah ve el-Hâc Hüseyin kapudanlar meclis-i ma‘kūd-ı mezkûrda keresteci esnafının kethüdâları Mustafa ve yiğitbaşıları es-Seyyid İbrahim ve esnaf-ı mezbûreden yirmi beş nefer müseccelü’l-esâmî kimesneler muvâcehelerinde Bahr-i siyâh tarafında vâki‘ Varna ve İnebolu ve Bartın ve sâir mahallerden Âsitâne-i sa‘âdete gelen kereste sefâini kadîmü’l-eyyâmdan berü Çöplük İskelesi demekle ma‘rûf iskeleye yanaşıp metâ‘ları olan envâ‘ ve ecnâs-ı keresteyi mimâr ağa, keresteciler kethüdâsı ve yiğitbaşıları ve sâirleri ba‘de’l-mu‘âyene ağa-i mûmâ-ileyh ma‘rifetiyle fiyatı vaz‘ ve vaz‘ olunan fiyat mûcebince esnaf ve sâir ibâdullaha fürûht olunup kerestenin kılletine bâ‘is olmamak için kefere sefînelerine ve muhtekir tâifesi mahzenlerine kereste verilmeyip ve zikr olunan iskeleden gayrı mahalle kereste sefînesi yanaşmayıp bu minvâl üzere nizâm verilip ve bu nizâm düstûrü’l-amel olmak üzere her biri ahd ü mîsâk etmiş iken zamân-ı kalîlde nizâm-ı mezkûra mürâ‘at olunmadığından nâşî keresteci esnafından ba‘zıları tama‘-ı hâm sevdâsıyla ashâbından bahâ-i kalîl ile iştirâ ve diledikleri bahâ ile ibâdullaha bey‘ ve etrâfda olan mahzenlerine vaz‘ ve kefere sefînelerine boşaldıp ol vechile kerestenin kılletine ve ibâdullahın muzâyakalarına bâ‘is olduklarını iddi‘â ve nizâmı için sâdır olan fermân-ı âlî mûcebince fîmâ-ba‘d zikr olunan Bahr-i siyâh tarafında vâki‘ Bartın ve İnebolu ve Varna ve sâir mahallerden Âsitâne-i sa‘âdete gelen kereste sefâini üslûb-ı sâbık üzere Çöplük İskelesi demekle ma‘rûf iskeleye yanaşıp metâ‘ları olan ecnâs-ı keresteyi mimârân-ı hâssa ve keresteciler kethüdâsı ve yiğitbaşıları ve sâir ustalar ba‘de’l-mu‘âyene her birinin değer-i bahâsı takdîr ve takvîm ve fiyatların hakk-ı adl üzere vaz‘ ve vaz‘ olunan fiyat mûcebince esnafa ve sâir ibâdullaha fürûht [ve] kefere sefînesine ve muhtekir tâifesinin mahzenlerine vaz‘ olunmayıp Âsitâne-i sa‘âdetde vâki‘ ebniyede müsta‘mel olup Mısr-ı Kāhire harcı olan keresteyi mevcûd bulunan Mısır kalyonları kapudanları dahi vaz‘ olunan fiyat mûcebince iştirâsına kimesne mâni‘ olmamak üzere emîn-i mûmâ-ileyh ve ser-mimâr-ı mezbûr ve esnaf-ı mezbûre ve kapudanlar ittifâklarıyla verdikleri nizâm fîmâ-ba‘d düstûrü’l-amel ve yedlerine tuğrâ-i garrâ-i sultânî ile mu‘anven emr-i âlî ihsân olunmak ricâsında olduklarını mevlânâ-yı mezbûr mahallinde ba‘de’t-tahrîr ümenâ-i şer‘le bi-ecma‘ihim meclis-i şer‘a gelip alâ-vukū‘ihi inhâ ve takrîr eylediği huzûr-ı âlîlerine i‘lâm olundu. Fî 19 min-Muharremi’l-harâm sene 1153.