Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 457 Hüküm no: 559 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samol v. Simyon’u öldüren Ligor hakkında gereğinin yapılması için ailesi gelene kadar hapsedilmesi Vilâyet-i Anadolu’da Ürgüb kazâsına tâbi‘ Zeli [Zelale] nâm karye ahâlîsinden olup İstanbul’da Eğrikapı kurbünde Avcıbey mahallesinde vâki‘ yağhânede mütemekkin iken bundan akdem hâlik olan Yağcı Samol v. Simyon v. Korba zimmînin verâseti zevcesi Agafile bt. Yorgi ve anası Gülistan bt. Loka Nasrâniyeler ile li-ebeveyn ammisi oğulları Agasti ve Lanbolos zimmîlere inhisarı lede’ş-şer‘i’l-enver mahzar-ı hasm-ı câhidde sâbit ve mütehakkık oldukdan sonra mezbûrân Agasti ve Lanbolos zimmîler Bâb Mahkemesi’nde Mumcu İsmail Beşe mübâşeretiyle meclis-i şer‘a ihzâr ettirdikleri Ligor v. Yorgi nâm zimmîden mezbûr Ligor mûrisimiz hâlik-i mesfûr Samol ile mârrü’z-zikr yağhânede mütemekkinler iken târîh-i i‘lâmdan beş gün mukaddem pazarrtesi gecesi sâ‘at ikide iken mezbûr Ligor âlet-i cârihadan beyâz kabzalı bıçak ile mesfûr Samol v. Simyon v. Korba’yı sol omuzu küreğinden bi-gayr-ı hakkın darb ü cerh ve katl eylediğinden sonra mezbûr Ligor mahzar-ı şuhûdda mesfûr Samol’u ben bıçak ile darb ve cerh ve katl eyledim deyü kirâren ve mirâren ikrâr ve i‘tirâf dahi etmekle mûcib-i şer‘îsi mezbûr Ligor’dan bi’l-verâse taleb ederiz deyü ba‘de’d-da‘vâ ve’l-inkâr müdde‘iyân-ı mezbûrân bâlâda tafsîl ve beyân olunduğu vech üzere mezbûr Ligor’un hâlik-i mesfûr Samol v. Simyon v. Korba’yı ben bıçak ile darb ve cerh eyledim deyü kirâren ve mirâren i‘tirâfını udûl-ı millet-i Nasârâdan sırran ve alenen lede’t-tezkiye şehâdetleri makbûle olan Yovan v. Yorgi ve Kiryako v. Kostantin nâm zimmîler şehâdetleriyle mezbûr Ligor zimmî muvâcehesinde vech-i şer‘î üzere isbât edip lâkin hâlik-i mesfûrun zevcesi ve anası mesfûretân Agafile ve Gülistan Nasrâniyeler mesbûku’z-zikr Zelli karyesinde mütemekkinler olup mûcib-i şer‘îsini istîfâda mezbûretânın huzûrları lâzım olmağın mesfûretân Âsitâne-i sa‘âdete gelinceye değin mûcib-i şer‘îsi tevkīf ve mezbûr Ligor’u habs olunmak iktizâ eylediği huzûr-ı âlîlerine i‘lâm olundu. Fî 24 min-Muharrem sene 1153.