Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 457 Hüküm no: 560 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan’ı öldürüp kaçan Çolak Mehmed’in arkadaşı olduğu için hapsedilen Hasan’ın olayla alakası olmadığı Bâ-mühr-i efendi Ma‘rûz Derûn-ı arzuhâlde ismi mastûr olup cerîhan katl olunan Hasan’ın verâseti zevcesi Hadîce ve sagīre sulbiye kızı Emine’ye ve babası gāib ani’l-meclis Abdullah nâm kimesneye ba‘de’l-inhisar sagīre-i mezbûrenin vâlidesi ve vasiyesi olan mezbûre Hadîce zâtı ba‘de’t-ta‘rîfi’ş-şer‘î meclis-i şer‘de Mumcu Yusuf Beşe mübâşeretiyle ihzâr olunan diğer Hasan muvâcehesinde mûrisim mezbûru katl eden gāib ani’l-meclis Çolak Mehmed nâm kimesnenin merkūm diğer Hasan refîki olmağla bundan akdem ahz ü habs ettirmişdim, el-hâletü hâzihi husûs-ı mezbûrda merkūm diğer Hasan’ın medhali ve sun‘u olmadığı yakīnen ma‘lûmum olmağla kefîli alınıp habsden ıtlâk olunsun dedikde merkūm Hasan’ın nefsine ve hîn-i mutâlebede meclis-i şer‘a ihzârına babası Mehmed b. Mustafa ve el-Hâc Ahmed b. Mehmed ve İsmail Çelebi b. Ali ve Berber Salih b. Receb ve Ömer b. Osman nâm kimesneler kefîl oldukları ba‘de’t-tescîl huzûr-ı âlîlerine i‘lâm olundu. Fî 28 min-Muharremi’l-harâm sene 1153.