Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 458 Hüküm no: 561 Orijinal metin no: [71a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali, Salih ve İbrahim’in, Ahmed Ağa’nın kendilerinden zorla paralarını aldığı yolundaki davalarından vazgeçtikleri Bâ-mühr-i efendi Ma‘rûz Vilâyet-i Anadolu’da Kurukavak nâhiyesi ahâlîsinden kendi taraflarından asîl ve nâhiye-i mezbûrede sâkin cerîdede isimleri mastûr re‘âyâ taraflarından vekâlet iddi‘â eden ashâb-ı arzuhâl Ali b. Hüseyin ve Salih b. Satılmış ve İbrahim b. Hasan ve Ahmed b. Satılmış ve Eyüb b. Mehmed ve Hüseyin b. Mehmed ve İbrahim b. Süleyman nâm kimesneler meclis-i şer‘de derûn-ı arzuhâlde mastûrü’l-ism Ahmed Ağa muvâcehesinde mezbûr Ahmed Ağa bin yüz elli bir ve elli iki senelerinde nâhiye-i mezbûrede bâ-fermân-ı âlî iştirâ cem‘ine memûr olmağla bizden ve müvekkillerimizden bi-gayr-ı hakkın zulmen hınta ve şa‘îr semenleri ve nukūd min-haysü’l-mecmû‘ yedi yüz guruşumuzu ahz eyledi deyü da‘vâya tasaddî etmiş idik, lâkin müdde‘âmızı ve vekâletimizi bir vechile isbâta kādir olmadığımız ecilden merkūm Ahmed Ağa ile olan da‘vâmızdan fâriğ olduk deyü her biri bi’t-tav‘i’s-sâf ikrâr eyledikleri huzûr-ı âlîlerine i‘lâm olundu. Fî 27 min-Muharremi’l-harâm sene 1153.