Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 460 Hüküm no: 567 Orijinal metin no: [71b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraçhanedeki leblebici dükkân gediğinin Mustafa’ya verildiği Bâ-mühr-i efendi Ma‘rûz Mahmiye-i İstanbul’da Leblebiciler Kethüdâsı Mustafa b. Şa‘bân ve yiğitbaşıları Abdullah b. Mehmed ve ustalarından el-Hâc Hüseyin b. Hasan ve Mehmed b. Hacı Osman ve Mehmed ve Abdülbaki ve Abdurrahman ve Ahmed ve diğer Ahmed ve Halil ve Usta Mehmed ve Hasan ve diğer Mehmed ve Usta Ahmed ve el-Hâc Abdi nâm kimesneler meclis-i şer‘de Leblebici es-Seyyid Mustafa b. Abdülgaffar muvâcehesinde Valide Hamâmı kurbünde vâki‘ leblebici dükkânı gedik olmak üzere gāib ani’l-meclis Usta Halil b. Mustafa nâm kimesnenin tasarrufunda olup işbu es-Seyyid Mustafa cümle ma‘rifetiyle bir müddet dükkân-ı mezbûrda leblebicilik san‘atı işlemiş idi, hâlâ dükkân-ı mezbûrun sâhibi dükkân-ı mezbûru âhara verip işbu es-Seyyid Mustafa dükkân ve gediksiz kalmağla Saraçhane kurbünde vâki‘ leblebici dükkân gediği mahlûl ve mezbûr es-Seyyid Mustafa’ya her vechile münâsib olmağla dükkân-ı mezbûr ustalar ma‘rifetleriyle mezbûr es-Seyyid Mustafa’ya verilip ol dahi rızâsıyla kabûl eyledi dedikleri huzûr-ı âlîlerine i‘lâm olundu. Fî 26 min-Muharremi’l-harâm sene 1153.