Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 461 Hüküm no: 568 Orijinal metin no: [71b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri keçesi işleyenlere mensup olmayan Külahçı İbrahim’in bu işi yapmaması Ma‘rûz Derûn-ı i‘lâmda mezkûr yeniçeri keçesi işleyen hırfetin kethüdâsı Abdi ve ustalarından yedi nefer mazbûtü’l-esâmî kimesneler Bâb Mahkemesi’nde meclis-i şer‘de yine derûn-ı i‘lâmda mezkûrü’l-ism külâhcı İbrahim mahzarında mezbûr İbrahim’in san‘atımızda kat‘an alâka ve medhali yoğiken mezbûr İbrahim san‘atımız olan yeniçeri keçesini işleyip ve nizâm-ı kadîmimize mugāyir vaz‘ u hareket edip beynimizde olan nizâmımızın ihtilâline bâ‘is olur deyü bundan akdem Bâb Mahkemesi’nde nâibü’ş-şer‘ olan Hüseyin Efendi huzûrunda her birimiz ba‘de’t-teşekkî merkūm İbrahim külâhcı tâifesinden olup bizim san‘atımızda kat‘â alâkası olmadığını ikrâr ve i‘tirâf edip işbu yedimizde olan i‘lâm-ı şer‘iyye mantûkunca men‘ olunmuş iken yine mezbûr İbrahim mütenebbih olmayıp san‘at-ı mezkûreyi işler deyü her biri ba‘de’t-teşekkî mezbûr İbrahim ber-vech-i muharrer zikr olunan i‘lâm-ı şer‘î mûcebince men‘ olunduğu ikrâr ve i‘tirâf etmeğin mûcebince mezbûrûnun san‘atları olan yeniçeri keçesi işlememek üzere merkūm İbrahim’e tenbîh olunduğu huzûr-ı âlîlerine i‘lâm olundu. Fî 27 min-Muharremi’l-harâm sene 1153.