Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 463 Hüküm no: 572 Orijinal metin no: [71b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefaen Ali’ye satılan evin, parasının ödenmesi sebebiyle Ahmed’e verilmesi Ma‘rûz Sâhib-i arzuhâl Ahmed Bâb Mahkemesi’nde meclis-i şer‘de arzuhâlde mezkûr es-Seyyid Ali muvâcehesinde zikri âtî vakfın mütevellîsi es-Seyyid Mustafa hâzır olduğu hâlde bundan akdem mezbûr es-Seyyid Ali’den altmış guruş istidâne ve kabz edip meblağ-ı mezbûr mukābelesinde İstanbul’da Hoca Hayreddin mahallesinde vâki‘ merhûm Kadıasker Mustafa Efendi Vakfı’ndan bi’l-icâreteyn tasarrufumda olan menzili mezbûr es-Seyyid Ali’ye bâ-ma‘rifet-i mütevellî vefâen fâriğ olmuş idim, hâlâ meblağ-ı mezbûru red ile menzil-i mezbûru taleb eylerim deyü da‘vâ ol dahi müdde‘î-i mezbûrun ferâğı kat‘îdir deyü vefâ olduğunu ba‘de’l-inkâr müdde‘î-i mezbûr müdde‘âsını udûlden Mustafa b. Ömer ve Hüseyin b. Abdullah şehâdetleriyle vech-i şer‘î üzere isbât etmeğin mûcebince menzil-i mezbûru ahz ve menzil-i mezbûru bâ-ma‘rifet-i mütevellî mezbûr Ahmed’e ferâğ ve teslîme mezbûr es-Seyyid Ali’ye tenbîh olunduğu huzûr-ı âlîlerine i‘lâm olundu. Fî 29 min-Muharrem sene 1153.