Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 465 Hüküm no: 577 Orijinal metin no: [72a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcülükle alakası olmayanlara engel olunması gerektiği Bâ-mühr-i efendi Ma‘rûz Mahmiye-i İstanbul’da kömürcüler kethüdâsı Eyüb b. Kamber ve hırfet-i mezkûreden el-Hâc İsmail b. Hasan ve Osman b. İbrahim ve Hüseyin b. Hamza ve Hüseyin b. Zekeriya ve Osman b. Süleyman ve Hüseyin b. İsmail ve Mustafa b. Murad ve Abdurrahman b. Mehmed ve Ahmed b. Hüseyin ve Mustafa b. Hasan ve sâir mazbûtü’l-esâmî kimesneler meclis-i şer‘de kadîmü’l-eyyâmdan berü terfîh-i ibâd için Istıranca ve ol havâlîde vâki‘ dağlarda ve kömür hark eden kömürcülere eyyâm-ı şitâda ma‘lûmü’l-mikdâr kömür akçesi verilip ba‘de’l-kabz sefîneler ile eyyâm-ı sayfda Âsitâne-i sa‘âdete nakl ve der-mahzen edegeldiğimiz kömürleri iki seneden beri kömürcülükde alâkası olmayan Silivri kasabası sükkânından Feyzullah ve Karabacak ve Sağıroğlu Tanaş ve refîkleri ol mahalde kömür hark eden kömürcülerden kömürü ziyâde bahâ ile iştirâ ve kasaba-i mezbûrede vâki‘ mahzenlerine ve sâir mahallere vaz‘ ve istedikleri vakitde sefîneler ile Âsitâne’ye nakl ve dedikleri bahâ ile fürûht ve ol vechile ibâdullahın muzâyakalarına ve nizâmımızın ihtilâline bâ‘is ü bâdî olmalarıyla bundan esbak mezbûrûn bu misilli hareketden fermân-ı âlîşân ile men‘ ü def‘ olunmuşlar iken hâlâ hilâf-ı emr-i âlî ke’l-evvel kömür iştirâ ve mahzenlerine vaz‘ ederler deyü teşekkî ve merkūmûn askerîlik iddi‘âsında olmalarıyla ocakları tarafından mübâşir ta‘yîn ve rüfekāları ile Âsitâne-i aliyyeye ihzâr ve ba‘de’l-mürâfa‘a ber-vech-i muharrer kömür iştirâsından men‘ ü def‘ olunmak bâbında fermân-ı âlî iltimâs eyledikleri huzûr-ı âlîlerine i‘lâm olundu. Fî-gurreti Saferi’l-hayr sene 1153.