Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 73 Hüküm no: 68 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal ve tevabii mukataasının yarım hissesine mutasarrıf olan Ahmed’e başkalarının müdahale etmemesi Kıdvetü’n-nüvvâbi’l-müteşerri‘în Üsküdar kazâsı muzâfâtından Kartal nâhiyesi nâibi ( ) mevlânâ -zîde ilmühû- tevkī‘-i refî‘-i hümâyûn vâsıl olıcak ma‘lûm ola ki kıdvetü’l-emâsil ve’l-akrân Ahmed -zîde kadruhû- Südde-i sa‘âdetime arzuhâl edüp Mukāta‘ât-ı Haremeyn’den Üsküdar kazâsı muzâfâtından Gekbûze’de vâki‘ merhûm ve mağfûrun-leh Sultân Orhan Gāzî -tâbe serâhu- Câmi‘-i şerîfi evkāfı mülhakātından nefs-i Kartal ve tevâbi‘i mukāta‘asının nısf hissesine mutasarrıf olan Seyyid Mehmed -zîde kadruhû- nısf hisse-i mezbûru bin yüz yetmiş dokuz senesi Martı ibtidâsından Şubat’ı gāyetine gelince zabt ve nısf hisseye âid olan mahsûlât ve rüsûmâtın ahz ü kabz eylemek ve taraf-ı âhardan müdâhale olunmamak içün bunun yedine memhûr ve <> ma‘lûmün-bih temessük verdiğini bildirip temessükü mûcebince hisse-i mezbûre kendüye zabt ve vâki‘ olan mahsûl ve rüsûmu kānûn ve defter mûcebince ahz ü kabz etdirilip mugāyir-i temessük âhardan müdâhale olunmamak bâbında hükm-i hümâyûnum ricâ etmeğin temessükü mûcebince zabt etdirilmek emrim olmuşdur buyurdum ki hükm-i şerîfim vusûl buldukda bu bâbda sâdır olan emr-i şerîfim üzere amel, dahi husûs-ı mezbûra bi-tamâmihi mukayyed ve temessüküne nazar edüp göresin mukāta‘a-i mezkûrun nısf hissesi[nin] mutasarrıfı mûmâ-ileyh tarafından işbu sene-i mübârekede buna der-uhde ve iltizâm olunup yedine memhûr ve ma‘lûmün-bih temessük verilmiş ise temessükü mûcebince zabt ve nısf hisseye âid olan mahsûl ve rüsûmu kānûn ve defter mûcebince ahz ü kabz etdirilip mugāyir-i temessük âhardan bir ferd[e] müdâhale ve ta‘arruz etdirmeyüp mazmûn-ı emr-i şerîfimle âmil olasın şöyle bilesin alâmet-i şerîfe i‘timâd kılasın. Tahrîren fî-evâili şehri Cemâziyelâhir li-sene tis‘a ve seb‘în ve mi’ete ve elf.