Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 470 Hüküm no: 588 Orijinal metin no: [73a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Kethüda’nın vakfettiği iki odaya Ali ve Mehmed Şahabeddin’in birlikte tasarruf etmeleri Bâ-mühr-i efendi Ma‘rûz Ashâb-ı hayrâtdan merhûm İbrahim Kethüdâ’nın evlâdından Ali nâm kimesne meclis-i şer‘de Mehmed Şahabeddin nâm kimesne muvâcehesinde mezbûr İbrahim Kethüdâ hayâtında mahmiye-i İstanbul’da Mustafa Bey mahallesinde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât iki bâb müteehhilîn odaları vakf ve tevliyetini evlâdına ve evlâd-ı evlâdına ve evlâd-ı evlâd-ı evlâdına şart ve ta‘yîn edip hâlâ ben evlâd-ı vâkıfdan olup derecede merkūm Mehmed Şahabeddin ile müsâvî iken tevliyet-i mezbûreyi merkūm Mehmed Şahabeddin müstakıllen zabt eder deyü da‘vâ ol dahi vâki‘ hâli müdde‘î-i mezbûrun takrîr-i meşrûhu üzere olduğunu ba‘de’l-ikrâr tevliyet-i mezbûreye ale’l-iştirâki’s-seviyy mutasarrıflar olmak üzere mezbûrânın beynleri tevfîk olunup kat‘-ı nizâ‘ eyledikleri huzûr-ı âlîlerine i‘lâm olundu. Hurrire fî-gurrei Safer sene 1153.