Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 472 Hüküm no: 592 Orijinal metin no: [73a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazar’ın ölmüş olan kocası Kiryazi’nin Ahmed Ağa’ya olan borcu konusunda sulh sağlandığı Ma‘rûz Muhzır Mehmed mübâşeretiyle Bâb Mahkemesi’nde ihzâr olunan Ahmed Ağa’nın hasmı olup şahsı ta‘rîf-i şer‘î ile mu‘arrefe olan Kazar bt. Şahin nâm Nasrâniye meclis-i şer‘-i enverde mezbûr Ahmed Ağa mahzarında mukaddemâ hâlik olan zevcim Kiryazi v. Yorgi v. Kasber nâm zimmî hayâtında benim iznim yoğiken bi-gayr-ı hakkın mülkümden beher miskāli dörder buçuk guruş kıymetli altı miskāl bir altın gerdanlığımı ahz ve mezbûr Ahmed Ağa’ya mezbûrun takrîri üzere cihet-i karzdan deyni olan elli guruş mukābelesinde rehin ve vaz‘ eyledi deyü zevcim mesfûrun helâkden sonra ber-vech-i muharrer rehin-i mezkûrun yedinde olduğunu ikrâr ve tahlîs-i rehin için benden deyn-i mezkûrunu taleb ettikde ben dahi zikr olunan gerdanlığın kıymeti mikdârı mâlımdan mezbûr Ahmed Ağa’ya otuz guruş verip gerdanlığı taleb eylediğimde ol dahi yedimden otuz guruşu ahz edip gerdanlığı bana red ve teslîm ettiğinden mâ‘adâ hâlik-i mesfûrun deyni dahi ma‘lûmum olmamağla meblağ-ı mezbûr otuz guruş ile zikri sebk eden gerdanlığımı mezbûr Ahmed Ağa’dan taleb ederim deyü tasaddî eylediğim da‘vâmdan ba‘de vukū‘i’l-münâza‘ât muslihûn tavassutuyla mezbûr Ahmed Ağa ile an-inkâr otuz guruş bedel-i makbûza sulh olup husûs-ı mezkûra müte‘allıka âmme-i da‘vâdan her birimiz âharın zimmetini ibrâ ve ıskāt eyledik deyü ikrârı ba‘de’t-tasdîk tescîl olunduğu huzûr-ı âlîlerine [i‘lâm] olundu. Fî 3 S sene 1153.