Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 478 Hüküm no: 605 Orijinal metin no: [74a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’ın evinin duvarına zarar vermesi sebebiyle Saime Hatun’un mağselini yıktırdığı Ma‘rûz Sâdır olan fermân-ı âlîlerine imtisâlen keşif nâibi Mevlânâ Hıfzı el-Hâc Mehmed Efendi hâssa mimârlarından el-Hâc Mustafa ve İbrahim Halîfeler ile mahmiye-i İstanbul’da Aksaray kurbünde Koğacı Dede mahallesinde vâki‘ mahall-i nizâ‘ın üzerine varıp Müslimîn huzûrlarında ba‘de akdi’l-meclis derûn-ı arzuhâlde mezkûretü’l-ism Saime Hatun zâtı ba‘de’t-ta‘rîfi’ş-şer‘î meclis-i ma‘kūd-ı mezkûrda câr-ı mülâsıkı sâhib-i arzuhâl el-Hâc Süleyman muvâcehesinde işbu benim menzilimde olan mağselhânemi mezbûr el-Hâc Süleyman bi-gayr-ı hakkın hedm etmekle mûcib-i şer‘îsini mezbûr el-Hâc Süleyman’dan taleb ederim deyü mezbûr el-Hâc Süleyman cevâbında mutasarrıf olduğum menzilimin duvarına muttasıl ve dibinde olan su kuyusuna dahi neşf ve duvarıma vehn târî ve zarâr-ı şer‘îsi olmağla müdde‘iye-i mezbûrenin emriyle hedm eyledim deyü ba‘de’d-def‘ mezbûre Saime dahi mezbûr el-Hâc Süleyman mağsel-i mezkûru kendi emriyle hedm eylediğini ba‘de’l-inkâr tavassut-ı muslihîn ile üç guruş bedel-i makbûza sulh olup husûs-ı mezkûra müte‘allıka da‘vâdan mezbûr el-Hâc Süleyman’ın zimmetini ibrâ ve ıskāt eyleyip ba‘de’l-yevm mezbûr el-Hâc Süleyman’ın duvarı ittisâline mağselhâne binâ ve ihdâs etmemek üzere müte‘ahhide ve ol vechile kat‘-ı nizâ‘ eylediklerin mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihi inhâ ve takrîr eyledikleri huzûr-ı âlîlerine i‘lâm olundu. Fî 7 S sene 1153.