Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 343 Hüküm no: 500 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salamon v. Semail’in sığır bahasından borcu olduğu Kasab tâifesinden olup İstanbul cemâ‘atinden Salamon v. Semail nâm Yahûdi meclis-i şer‘-i hatîr-i lâzımü’t-tevkīrde celebkeşân tâifesinden işbu hâmilü’l-kitâb Polıharna v. Dimo nâm zimmî muvâcehesinde ikrâr ve takrîr-i kelâm edip mezbûr Polcerne’ye târîh-i kitâbdan altı ay mukaddem safka-i vâhide ile mezbûrun yedinden müşterâ ve makbûzum olan adedi beynimizde ilm-i şer‘î ile ma‘lûm kara sığır bahâsından zimmetimde bâkī kalan beş bin akçe deynim olup meblağ-ı mezbûrun beş yüz yirmi akçesini hâlâ kendi def‘ ve teslîm edip bin dört yüz seksen akçesini dahi üç güne değin edâ etmeğe müte‘ahhid olduğundan sonra bâkī kalan üç bin akçeyi târîh-i kitâbdan elli gün tamamına değin mezbûr Polcerne üzerime te’cîl eyledi, meblağ-ı mezbûr üç bin akçe ecel-i merkūm hu[l]ûlünde zimmetimde lâzımü’l-edâ ve vâcibü’l-kazâ deynimdir dedikde gıbbe’t-tasdîk ve’t-taleb mâ-vaka‘a ketb olundu. Fi’l-yevmi’s-sâmin aşer min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Hasan Beşe b. Mehmed el-mübâşir, Ali Beşe b. Abdullah el-mübâşir, Pîrî Beşe b. Hüseyin, Rıdvan [b.] Abdullah, Mehmed Çelebi b. Hüseyin, Kemhacı Mehmed, el-Hâc Şa‘ban [b.] Ahmed, Halil Beşe çukadâr ve gayruhum.