Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 343 Hüküm no: 501 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa Reis’in Mehmed Çelebi’ye borcu olduğu Karasu nâm karye sâkinlerinden olup sefîne reislerinden olan Musa Reis b. Bayezid mahfil-i kazâda işbu bâ‘isü’l-kitâb Mehmed Çelebi b. Ali mahzarında ikrâr ve takrîr-i kelâm edip mezbûr Mehmed Çelebi karye-i mezbûrede bana bir sefîne yapdır deyü mukaddemâ tarafından beni tevkîl edip yedime elli bin nakd râyic fi’l-vakt fıddî akçe def‘ ve teslîm eyleyip ben dahi vekâlet-i mezbûreyi kabûl ve meblağ-ı mezbûr elli bin akçeyi merkūm Mehmed Çelebi yedinden alıp karye-i mezbûreye varıp el-ân taht-ı yedimde olan şayka tâ‘bir olunur sefînenin bahâsına [binâsına] şürû‘ eylediğimde meblağ-ı mezbûr elli bin akçe kifâyet etmemekle ben dahi mezbûr Mehmed Çelebi’nin rızâsıyla birkaç akçe zam edip tekmîl eylemiş idim. El-hâletü hâzihî mezbûr Mehmed Çelebi ile hesâb eylediğimizde ol sefîne beynimizde on sekiz hisse olup beş hissesi benim ve on üç hissesi mezbûr Mehmed Çelebi’nin mülk-i mahzı ve hakk-ı sırfı olduğundan mâ‘adâ mezbûr Mehmed Çelebi’den on beş bin mezbûru’n-na‘t akçe iktirâz ve tesellüm eyledim, meblağ-ı mezbûr on beş bin akçe dahi merkūm Mehmed Çelebi’ye cihet-i karz-ı şer‘îden zimmetimde lâzımü’l-edâ ve vâcibü’l-kazâ deynimdir dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’s-sâmin aşer min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Fethullah Çelebi b. Ahmed, Ahmed Çelebi b. Mustafa, Mehmed Çelebi b. Yusuf, Mustafa Çelebi b. Ahmed, Keresteci Abdi Beşe, Hızır Beşe b. Mehmed Reis, Mustafa b. Receb, Rıdvan b. Abdullah ve gayruhum.