Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 486 Hüküm no: 622 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hıristo’nun çeşitli kişilere olan borcunu taksitle ödeyeceği Ma‘rûz Kalpakcı tâifesinden sâhib-i arzuhâl Hıristo v. İsbitco zimmî Bâb Mahkemesi’nde meclis-i şer‘de Mustafa Beşe’ye cihet-i deyn-i şer‘îden altmış beş guruş ve Yorgi zimmîye kezâlik cihet-i deyn-i şer‘îden kırk beş guruş ve Aram zimmîye kezâlik cihet-i deyn-i şer‘îden elli guruş ve Avanes zimmîye kezâlik cihet-i deyn-i şer‘îden otuz üç guruş ki cem‘an mezbûrûn zimmetinde edâsı lâzım yüz doksan üç guruş deyni olduğu ikrârıyla sâbit oldukdan sonra medyûn-ı mesfûrun hâlâ ve def‘aten meblağ-ı mecmû‘-ı mezkûru edâya iktidârı olmamağla taksîte tâlib oldukda mezbûrdan dahi her re’s-i şehrde kendülere guruş başına bir akçe verip meblağ-ı mecmû‘-ı mezkûru târîh-i i‘lâmdan yüz yirmi ay tamâmına değin edâ etmek üzere mesfûr dahi senevî taksît eylediklerinde ol dahi ba‘de’l-kabûl vech-i muharrer üzere mukassatan edâya ta‘ahhüd eyleyip kat‘-ı nizâ‘ eyledikleri ba‘de’t-tescîl huzûr-ı âlîlerine i‘lâm olundu. Fî 15 S sene 1153.