Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 344 Hüküm no: 502 Orijinal metin no: [74b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi’nin evini sattığı Mahmiye-i İstanbul’da Yavaşca Şahin Mahallesi’nde sâkin Hasan Çelebi b. Ca‘fer nâm şâbb-ı emred mahfil-i kazâda işbu râfi‘u’l-kitâb Ahmed Çelebi b. Mehmed nâm kimesne mahzarında ikrâr u i‘tirâf edip vâlidem olup bundan akdem vefât eden Gülistan bt. Abdullah nâm hatundan irs-i şer‘le bana intikāl edip zikri âtî akdin sudûruna değin silk ve mülkümde münselik olup mahalle-i mezbûrede vâki‘ bir tarafı müşteri-i mezbûr Ahmed Çelebi tasarrufunda olan vakıf menzile ve iki tarafı el-Hâc Receb b. Abdullah mülküne ve bir tarafı tarîk-i hâssa müntehî iki bâb fevkānî odayı ve bir su kuyusunu ve muhavvata ve kenîfi müştemil cemî‘-i mülk menzilimin nısf-ı şâyi‘ini âmme-i tevâbi‘ ve levâhıkı ve kâffe-i hukūk ve merâfıkı ile mezbûr Ahmed Çelebi’ye yüz kırk kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzere iştirâ ve tesellüm ve kabûl eyledikden sonra semen-i mezbûr yüz kırk kıt‘a riyâlî guruşu mezbûr Ahmed Çelebi yedinden bi’t-tamam ve’l-kemâl ahz u kabz eyledim, ba‘de’l-yevm cemî-i menzil-i mezkûrun nısf-ı şâyi‘i mezbûr Ahmed Çelebi’nin mülk-i müşterâsı ve hakk-ı sırfıdır, keyfe mâ yeşâ’ ve yehtâr mutasarrıf olsun dedikde mukırr-ı mezbûrun ikrâr-ı meşrûhunu mezbûr Ahmed Çelebi vicâhen tasdîk ve şifâhen tahkīk edicek mâ-vaka‘a bi’t-taleb ketb olundu. Fi’l-yevmi’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Abdülkerim b. Mehmed el-imâm, Mustafa Çelebi b. Ca‘fer, el-Hâc Mehmed b. Himmet, Mehmed Çelebi b. Hüseyin, Ali b. Resül.