Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 486 Hüküm no: 624 Orijinal metin no: [75a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf mütevellisi Saliha Hatun, üzerinde ihtilaf olan dükkânlardan üçünü Ahmed Ağa’ya birini de Havva Hatun’a kiraya vererek anlaşmazlığa son verdiği Ma‘rûz Keşif Sâdır olan fermân-ı âlîlerine imtisâlen savb-ı şer‘den irsâl olunan keşif nâibi Hıfzı el-Hâc Mehmed Efendi dâ‘îleri hâssa mimârı hulefâsından Süleyman Halîfe ile mahmiye-i İstanbul’da Davudpaşa Câmi‘i kurbünde merhûm Nakībü’l-eşrâf es-Seyyid Mehmed Efendi türbesi ittisâlinde vâki‘ mahall-i nizâ‘ın üzerine varıp Müslimîn huzûrunda ba‘de akdi’l-meclis sâhibe-i arzuhâl evlâdiyet ve meşrûtiyet üzere mütevellîyesi ve zâtı ba‘de’t-ta‘rîfi’ş-şer‘î Şerife Saliha Hatun meclis-i ma‘kūd-ı mezkûrda Davudpaşa mütevellîsi vekîli Mustafa odabaşı-yı hâs olduğu halde derûn-ı arzuhâlde mezkûrü’l-ism Ahmed Ağa ve Havva Hatun tarafından vekîl-i sâbitü’l-vekâle İsmail Çelebi muvâcehelerinde işbu mu‘âyene olunan mimâr-ı mezbûr mesâhası üzere mezbûr Ahmed Ağa tasarrufunda olan üç bâb dekâkîn derûnunda tûlen on dört zirâ‘ ve arzen bir zirâ‘ on sekiz parmak mezbûre Havva Hatun tasarrufunda olan bir bâb dükkân derûnunda tûlen dört zirâ‘ ve arzen bir zirâ‘ on sekiz parmak damlalık arsasını bundan akdem dekâkîn muhterik oldukda Davudpaşa Vakfı’ndan mutasarrıf oldukları dekâkîn-i mezbûreye bi-gayr-ı hakkın mezbûrân idhâl etmekle suâl olunup keff-i yedlerine tenbîh olunmak matlûbumdur deyü bi’t-tevliye ba‘de’d-da‘vâ ve’l-inkâr hâl minvâl-i muharrer üzere olduğunu altı nefer şuhûd-ı udûl ile ba‘de’l-isbât mezbûr Ahmed Ağa dahi ber-vech-i muharrer ikrâr ve i‘tirâf eyleyip mârrü’z-zikr Davudpaşa mütevellîsi vekîli dahi ba‘de’t-tasdîk yirmi iki guruş mu‘accel makbûz ve beher şehr altışar akçe müeccel ile üç bâb dekâkîn-i mezbûreyi Ahmed Ağa’ya ve beş guruş mu‘accel makbûz ve beher şehr altışar akçe müeccel ile mezbûre Havva Hatun’a mezbûre Şerife Saliha Hatun bi’t-tevliye îcâr onlar dahi ber-vech-i muharrer istîcâr ve kabûl edip bu vechile kat‘-ı nizâ‘ eylediklerin mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihi inhâ eylediği huzûr-ı âlîlerine i‘lâm olundu. Fî 13 S sene 1153.