Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 488 Hüküm no: 626 Orijinal metin no: [75a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemel ve Mayer’in Yusuf b. Abdullah’a olan borcunu ödemesi Bâ-mühr-i efendi Ma‘rûz Sâhib-i arzuhâl Yusuf b. Abdullah nâm kimesne meclis-i şer‘de derûn-ı arzuhâlde mastûrü’l-ism olan Sarrâf Kemel v. Ellez nâm Yahûdi muvâcehesinde bin yüz elli senesi Rebî‘ülâhirinin gurresinde mâlımdan mezbûr Kemel ile li-ebeveyn er karındaşı gāib ani’l-meclis Mayer nâm Yahûdiler bin yüz yirmi guruş ikrâz ve teslîm onlar dahi istikrâz ve tesellüm ve her biri âharın zimmetine lâzım gelen meblağa kefâlet-i sahîh-i şer‘î ile zâmin olmuşlar idi hâlâ meblağ-ı mezbûr bin yüz yirmi guruşu ber-vech-i muharrer asâleten ve kefâletine binâen mesfûr Kemel’den taleb ederim deyü da‘vâ ol dahi bi’t-tav‘i’s-sâf ikrâr etmeğin mûcebince meblağ-ı mezbûr bin yüz yirmi guruş asâleten ve kefâleten edâsına mesfûr Kemel’e tenbîh olunduğu huzûr-ı âlîlerine i‘lâm olundu. Fî 15 S sene 1153.