Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 489 Hüküm no: 629 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman’ın Kütahya Naibi Mustafa Efendi’den talep ettiği paranın bir dava neticesinde kendisinden alınarak davalıya teslim edilen para olduğu Ma‘rûz Sâhib-i arzuhâl el-Hâc Osman Bâb Mahkemesi’nde meclis-i şer‘de derûn-ı arzuhâlde mezkûr Mustafa Efendi muvâcehesinde mezbûr Mustafa Efendi bundan akdem Kütahya nâibi olup zamân-ı kazâsında benden işbu yedimde olan üç kıt‘a hüccet için ecr-i mislinden ziyâde yüz otuz üç guruş ile yüz elli guruş kıymetli bir re’s doru atımı ahz u kabz etmekle taleb ederim deyü da‘vâ ol dahi cevâbında merkūm el-Hâc Osman zikr olunan atı Kütahya ahâlîsinden Ali Ağa nâm kimesneden bi-gayr-ı hakkın gasb edip ve cihet-i deyn-i şer‘îden ol mikdâr akçe deyni olmağla mezbûr Ali Ağa meblağ-ı mezbûr ile mârrü’z-zikr atı mezbûr el-Hâc Osman’dan ba‘de’d-da‘vâ ve’l-isbât meblağ-ı mezbûrun ve zikr olunan atın merkūm el-Hâc Osman’dan şer‘an tahsîli lâzım gelmeğin ben dahi tahsîl edip mezbûr Ali Ağa’ya teslîm eyledim deyü def‘ eyledikde merkūm Mustafa Efendi yedinde olan fetvâ-i şerîfe mûcebince husûs-ı mezkûrda ve kavliyle tasdîk olunmağın mûcebiyle müdde‘î-i mezbûr bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 17 S sene 1153.