Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 345 Hüküm no: 503 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Bali ve kız kardeşi Fâtıma’nın evlerini sattıkları Medîne-i İznikmid mahallâtından Debbağhâne Mahallesi sükkânından Ahmed b. Bali nâm kimesne asâleten ve li-ebeveyn kız karındaşı Fâtıma tarafından bey‘-i âti’z-zikri ikrâra ve kabz-ı semene vekîl olup vekâleti Hasan b. Abdullah ve Mahmud b. Murad şehâdetleriyle şer‘an sâbite olan mezbûre Fâtıma’nın zevci Hüseyin Beşe b. Mahmud nâm kimesne vekâleten ve meclis-i şer‘-i hatîr-i lâzımü’t-tevkīrde işbu sâhibü’l-kitâb İbrahim b. İsmail mahzarında ikrâr-ı tâm ve takrîr-i kelâm edip müvekkile-i mezbûre Fâtıma ile bana babamız müteveffâ-i mezbûr Bali’den irs-i şer‘le intikāl edip zabt ve tasarrufumuzda olan mahalle-i mezbûrede vâki‘ bir tarafdan Mahmud Dayı mülkü ve bir tarafdan Veli mülkü ve iki tarafdan tarîk-i âm ile mahdûd mülk menzilimizi merkūm İbrahim’e üç bin dört yüz akçeye bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzere iştirâ ve tesellüm ve kabûl eyleyip semeni olan meblağ-ı mezbûr üç bin dört yüz fıddî râyic fi’l-vakt akçeyi mezbûr İbrahim yedinden alıp kabz eylediğimizden sonra menzil-i mezbûru mahallinde zabt ve tasarrufa asâleten merkūm ve vekâleten merkūm İbrahim’i taslît eyledik dediklerinde mukırrân-ı mezbûrân Ahmed ve Hüseyin’i ikrâr-ı meşrûhlarında el-mukarru lehü’l-merkūm İbrahim vicâhen tasdîk ve şifâhen tahkīk etmeğin mâ-vaka‘a gıbbe’t-taleb ketb ü sebt olundu. Tahrîren fi’l-yevmi’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Mehmed Reis b. Berkalem?, Musa b. İbrahim, Hasan b. İvaz, Hasan b. Hüseyin, Pîrî b. Hüseyin, İbrahim b. Davud, Rıdvan b. Abdullah, Muharrem b. Abdullah ve gayruhum.