Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 492 Hüküm no: 636 Orijinal metin no: [75b-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan hayatta iken evini aylık olarak kiraya verdiği Rukiye’den on iki aylık kira talebinde bulunulamayacağı Ma‘rûz Derûn-ı arzuhâlde mezkûr müteveffâ Hasan b. Abdullah’ın zevcesi ve evlâd-ı sıgārın kıbel-i şer‘den mansûb vasiyesi olup zâtı ta‘rîf-i şer‘î ile mu‘arrefe olan Ümmügülsüm Hatun Bâb Mahkemesi’nde meclis-i şer‘de zâtı ta‘rîf-i şer‘î ile mu‘arrefe olan sâhibe-i arzuhâl Rukiye Hatun muvâcehesinde zevcim mezbûr Hasan hayâtında (°) mahallesinde vâki‘ vakıf menzilini mezbûre Rukiye’nin zevci gāib ani’l-beled Osman nâm kimesneye beher mâh yüz seksener akçeye îcâr ettikde ol dahi ba‘de’l-istîcâr mezbûr Osman menzil-i mezkûra zevcesi merkūme Rukiye’yi ba‘de’l-iskân kendi diyâr-ı âhara gittikden sonra zevcim mezbûr Hasan fevt olup menzil-i mezkûr sıgār-ı merkūma intikāl etmekle menzil-i mezbûrun on iki aylık iki bin yüz altmış akçe icâresini mezbûre Rukiye’den taleb ederim deyü bi’l-vesâye eylediği da‘vâsında vasiye-i mezbûre Ümmügülsüm’ün takrîri üzere mezbûre Rukiye’den icâre talebi meşrû‘ olmayıp mezbûre Rukiye’ye suâl dahi teveccüh etmemeğin vasiye-i mezbûre Ümmügülsüm bi-gayr-ı vechin icâre talebiyle merkūme Rukiye’ye mu‘ârazadan men‘ olunduğu huzûr-ı âlîlerine i‘lâm olundu. Fî 17 S sene 1153.