Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 492 Hüküm no: 637 Orijinal metin no: [75b-9] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe’nin Yusuf’a olan borcunu ödemesi Ma‘rûz Mumcu Mehmed mübâşeretiyle Bâb Mahkemesi’ne ihzâr olunan İbrahim Beşe’nin hasmı Yusuf meclis-i şer‘den mezbûr İbrahim Beşe muvâcehesinde mezbûr İbrahim Beşe’ye târîh-i i‘lâmdan iki sene mukaddem bi-tarîkı’l-emâne elli guruş def‘ ve teslîm eyledim, hâlâ taleb ederim deyü da‘vâ ol dahi ikrâr lâkin meblağ-ı mezbûrun otuz guruşunu mezbûrun zimmetinde iki senelik menzil icâresi müctemi‘ olan otuz guruşa takas ve mahsûb ettiğimde ol dahi mukāssa ve kabûl ettikden sonra kendüye dahi on dokuz guruş bir rub‘ guruş teslîm edip zimmetimde ancak otuz para deynim bâkī kalmışdır deyü ba‘de’d-def‘ ve’l-inkâr mezbûr İbrahim Beşe def‘-i mezkûrunu lede’t-tezkiye adâvetleri [adâletleri] zâhir olan Ahmed b. Hüseyin ve Halil b. İbrahim nâm kimesneler ile mezbûr Yusuf muvâcehesinde vech-i şer‘-i üzere isbât eyledikden sonra ikrârı mertebesi olan otuz parayı müdde‘î-i mezbûra edâya mezbûr İbrahim Beşe’ye ba‘de’t-tenbîh müdde‘î-i mezbûr Yusuf ziyâde müdde‘âsıyla bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 18 S sene 1153.