Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 493 Hüküm no: 638 Orijinal metin no: [76a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden babasından kalan malları almak için Bartın’a giden Ayşe’ye engel olunmaması Ma‘rûz Sâhibe-i arzuhâl Âişe an-asl Âsitâne-i sa‘âdetde Canbâziye mahallesinde mütevellide ve hâlâ mahalle-i merkūmede sâkine iken babası Mehmed nâm [kimesne] Bartın kasabasına ticâret üzere gidip kasaba-i merkūmede vefât etmekle hâlâ mezbûre Âişe babası müteveffâ-yı mezbûr Mehmed’in mîrâsını taleb ve da‘vâ ve ahz u kabz için kasaba-i merkūma gitmek murâd ettiğini ahâlî-i mahallesinden el-Hâc Mehmed b. Abdullah ve Ahmed Çelebi b. Halil ve Hasan Ağa b. İbrahim ve el-Hâc Mustafa b. el-Hâc Mehmed meclis-i şer‘de haber verip ve mezbûre Âişe’nin iddi‘âsını vâkı‘a mutâbık ve nefsü’l-emrdir deyü şehâdet etmeleriyle mezbûre Âişe zevci Osman ve tahmînen beş yaşında sagīr oğlu Mehmed ile kasaba-i merkūma varıp gelince mürûr-ı ubûruna kimesne mümâna‘at etmemek üzere hükm-i hümâyûn sadaka ve ihsân buyrulmak üzere istirhâm eder. Fî 18 S sene 1153.