Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 493 Hüküm no: 639 Orijinal metin no: [76a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hatun Vakfı’na ait değirmene, yandaki evin damlalığından gelen zararın giderildiği Ma‘rûz Sâdır olan fermân-ı âlîlerine imtisâlen cânib-i şer‘den irsâl olunan keşif nâibi Hıfzı el-Hâc Mehmed Efendi hâssa mimârlarından Şa‘bân Halîfe ile mahmiye-i İstanbul’da Küçük Mustafa Paşa kurbünde Molla Hüsrev mahallesinde vâki‘ merhûme Emetullah Hatun Vakfı’ndan olan değirmene varıp huzûr-ı Müslimînde akd-i meclis-i şer‘ ettikde vakf-ı mezbûrun kāimmakām-ı mütevellîsi sâhib-i arzuhâl Mustafa Çelebi meclis-i ma‘kūd-ı mezkûrda değirmen-i mezkûrun ittisâlinde mülk menzilin yirmi dört sehmden üç sehm hisseye mutasarrıfa olan Ümmügülsüm ve on dört sehm hisseye mutasarrıf olan sagīr Mustafa ve yedi sehm hisseye mutasarrıfa olan sagīre Emine’nin vasiyeleri mezbûre Ümmügülsüm Hatun tarafından vekîl-i sâbitü’l-vekâlesi zevci Yusuf Efendi muvâcehesinde işbu mu‘âyene olunan mimâr-ı mezbûr mesâhası üzere tûlen yirmi zirâ‘ ve arzen bir başı bir zirâ‘ ve bir başı bir zirâ‘ yedi parmak değirmen-i mezkûrun damlalık arsası üzerine menzil-i mezkûr dâhiliyesinde bundan akdem bir bâb tûlen sekiz zirâ‘ ve arzen iki zirâ‘ şehnişîn ve üzerine bir zirâ‘ sekiz parmak saçak ihrâc olunup damlalık arsasından dahi iki zirâ‘ bir [par]mak tecâvüzü olmağla mârrü’z-zikr değirmen üzerine damlası cereyân ve hâriciyesinde vâki‘ oda kapısı önünde müceddeden binâ olunan sofasının nîm zirâ‘ saçak tecâvüzü ile kezâlik damlası cereyân ve ol vechile zarâr-ı şer‘îsi olmağla men‘ ü def‘ olunmak bi’t-tevliye matlûbumdur deyü ba‘de’d-da‘vâ ve’n-nazar fi’l-hakīka minvâl-i muharrer üzere zarârı zâhir oldukdan sonra vekîl-i mezbûr Yusuf Efendi cevâbında mârrü’z-zikr damlalık vakf-ı mezbûrdan olduğunu ba‘de’l-inkâr vakıf beyyinesi evlâ olup taraf-ı vakfdan mütevellî-yi mezbûrdan beyyine taleb olunup ityân-ı beyyine esnâsında iken sâlifü’z-zikr oda ve sofanın damlasını oluk vaz‘ıyla menzil-i mezkûr derûnuna icrâ ve ol vechile zarâr-ı şer‘îsini men‘ ü def‘ ve değirmen-i mezkûrun menzil derûnunda olan tûlen altı zirâ‘ ve arzen altı parmak damlalık oluğunu kadîmî üzere ibkā ve bu vechile kat‘-ı nizâ‘ eylediklerini mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihi inhâ ve takrîr eyledikleri huzûr-ı âlîlerine i‘lâm olundu. Fî 16 S sene 1153.