Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 496 Hüküm no: 646 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin borçlarını parası olduğunda ödeyeceği Ma‘rûz Anadolu kuzâtından sâhib-i arzuhâl Mehmed Efendi’nin dâyinlerinden Kayyım Molla Mustafa ber-mûceb-i i‘lâm doksan sekiz guruş hakkını ve diğer Mustafa dahi cihet-i karzdan seksen yedi guruş hakkını ve Ömer Efendi dahi cihet-i karzdan yüz otuz guruş hakkını ve Sarrâc Mehmed’in vekîl-i şer‘îsi mezbûr Ömer Efendi vekâleten yüz guruşu merkūm Mehmed Efendi kendülerine alâ-mehil edâ etmek üzere merkūmu vakt-i yesârına değin tecîl ettiklerinde ol dahi kabûl ve vech-i muharrer üzere edâya ta‘ahhüd eylediği Mahkeme-i Bâb’da tescîl olundukdan sonra merkūm Mehmed Efendi fakīrü’l-hâl ve kesîrü’l-iyâl olup Anadolu kaleminde munassab olup kendüye rutûbet ve edâ-i deyne kudret gelinceye değin bâlâ-yı arzuhâlde isimleri mastûr dâyinleri hâlâ ve def‘aten edâ-i deyn mutâlebesiyle kendüyü ta‘cîz ve rencîde etmemek üzere fermân-ı âlî sadaka ve ihsân buyrulmak üzere istirhâm ettiği huzûr-ı âlîlerine i‘lâm olundu. Fî 19 S sene 1153.