Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 497 Hüküm no: 647 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kantari Ali’nin alacağı olduğunu ispatlayamadığı Bâ-mühr-i efendi Ma‘rûz Derûn-ı arzuhâlde mastûrü’l-ism Kantarî Ali nâm kimesne meclis-i şer‘de sâhibey-i arzuhâl Musa Beşe ve Ali Beşe nâm kimesneler muvâcehelerinde târîh-i i‘lâmdan yirmi altı ay mukaddem mezbûrân Musa Beşe ve Ali Beşe ile müteveffâ İsa Beşe’ye mâlımdan yetmiş guruş ikrâz ve teslîm eylediğimde onlar dahi istikrâz ve tesellüm ve her biri âharın zimmetine lâzım gelen meblağa kefâlet-i sahîha-i şer‘iyye ile kefîl olduklarından sonra meblağ-ı mezbûrun otuz guruşunu ahz etmiş idim, el-hâletü hâzihi meblağ-ı mezbûreden bâkī kalan kırk guruşu asâlet ve kefâletlerine binâen mezbûrân Musa Beşe ve Ali Beşe’den taleb ederim deyü ba‘de’d-da‘vâ ve’l-inkâr müdde‘î-i mezbûrun müdde‘âsına ikāmet eylediği şâhidlerinin şehâdetlerinde tezvîr fehm olunmağın iltifât olunmayıp ve müde‘î-i mezbûr Kantarî Ali dahi tahlîfe tâlib olmamağla mûcebince bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 19 S sene 1153.