Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 497 Hüküm no: 648 Orijinal metin no: [76b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin fakir olması sebebiyle borcu için hapsedilmemesi Ma‘rûz Sâhib-i arzuhâl Hâfızzâde Ahmed Efendi’nin dâyinlerinden fahrü’l-müderrisîni’l-kirâm Esad Efendi’ye üç yüz yirmi guruş ve Mehmed Efendi’ye seksen guruş ve diğer Mehmed Efendi’ye yüz elli guruş ve İbrahim Çelebi’ye iki yüz elli guruş ve Şerif Yahya Efendi’ye seksen guruş bi’l-ikrâr şer‘an sâbit olan haklarını mezbûr Ahmed Efendi kendülerine def‘aten edâya kādir olmadığını mukırlar olup mezbûr Ahmed Efendi alâ-mehil edâ etmek üzere vakt-i yesârına dek tecîl eylediklerinden sonra merkūm Ahmed Efendi fakīrü’l-hâl ve kesîrü’l-iyâl olup kendüye rutûbet ve edâ-i deyne kudret gelinceye değin tevkīf olunup âhar dâyini olan Şeyh Ahmed Efendi nâm müteveffânın sulbî sagīr oğlu Lütfullah ve sulbiye sagīre kızı Âişe’nin vâlideleri ve vasiyeleri olup müteveffâ-yı mezbûrun zevcesi Hayrünnisa nâm hatun ber-mûceb-i i‘lâm mahkûmun-bih olan iki yüz guruş için bir müddet habs ve tazyîk olunup ba‘dehû mezbûre Hayrünnisa ile terâfü‘lerinde yesâr beyyinesi evlâ olmağla mezbûr Ahmed Efendi’nin yesârına beyyine taleb olunup bir vechile ityân-ı beyyineye kādire olmamağla mezbûr Ahmed Efendi’nin si‘at-i hâline değin nazar olunup meblağ-ı mahkûmun-bih-i mezbûr için habs iktizâ etmediği huzûr-ı âlîlerine i‘lâm olundu. Fî 15 S sene 1153.