Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 498 Hüküm no: 649 Orijinal metin no: [76b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Özbekler Tekkesi’ne komşu olup taş duvarını yıkan Ahmed Ağa’nın kendi parasıyla tekrar yapmayı kabul ettiği Keşf Ma‘rûz Sâdır olan fermân-ı âlîlerine imtisâlen cânib-i şer‘den irsâl olunan Keşif Nâibi Hıfzı el-Hâc Mehmed Efendi dâ‘îleri hâssa mimârlarından el-Hâc Mustafa Halîfe ile mahmiye-i İstanbul’da Mehmed Paşa Câmi‘-i şerîfi kurbünde İskender Ağa mahallesinde vâki‘ defterdâr-ı sâbık merhûm İsmail Efendi’nin Özbekler fukarâsına meşrûta olmak üzere binâ eylediği tekyeye varıp huzûr-ı Müslimînde akd eylediği meclis-i şer‘de vakf-ı mezbûrun meşrûtiyet üzere mütevellîsi ve şeyhi sâhib-i arzuhâl Şeyh Mehmed meclis-i ma‘kūd-ı mezkûrda derûn-ı arzuhâlde ismi mezkûr câr-ı mülâsıkı Ahmed Ağa tarafında vekîl-i sâbitü’l-vekâlesi Hüseyin Efendi muvâcehesinde işbu mu‘âyene olunan vakf-ı mezbûrun mimâr-ı mezbûr mesâhası üzere mülk arsası tarafından tûlen yirmi bir zirâ‘ ve arzen bir zirâ‘ taş çamur duvarı ve yine Harameyn Vakfı arsası ittisâlinde tûlen on dokuz zirâ‘ kezâlik taş çamur duvarı vakf-ı mezbûrdan olmak iktizâ eder alâmet-i mevcûdesi var iken bi-gayr-ı hakkın vaz‘-ı yed ve hedmine mübâşeret eder suâl olunup keff-i yedine tenbîh olunmak bi’t-tevliye matlûbumdur deyü ba‘de’d-da‘vâ vekîl-i mezbûr vaz‘-ı yed ve ba‘zı mahallini hedm eylediğini ikrâr mârrü’z-zikr duvarları vakf-ı mezbûrdan olduğunu ba‘de’l-inkâr vakıf beyyinesi evlâ olmağla ityân-ı beyyine sadedinde iken nef‘an li’l-vakf mârrü’z-zikr duvarı vekîl-i mezbûr müvekkil-i merkūm Ahmed Ağa’nın mâlından vakf-ı mezbûra teberru‘an kifâyet mikdârı enkāz-ı mevcûduyla kârgîr binâ edip müvekkil-i mezbûrun isti‘mâline mütevellî-yi mezbûr dahi mümâna‘at etmemek üzere kat‘-ı nizâ‘ eylediklerin mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihi inhâ eylediği huzûr-ı âlîlerine i‘lâm olundu. Bâkī emr hazret-i men-lehü’l-emrindir. Fî 20 S sene 1153.