Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 498 Hüküm no: 650 Orijinal metin no: [76b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agob’un Sarraf Markar’a olan borcunu ödemesi Ma‘rûz Sâhib-i arzuhâl Sarrâf Markar v. Arakil nâm zimmî meclis-i şer‘de derûn-ı arzuhâlde mastûrü’l-ism Agob v. Sarab nâm zimmî muvâcehesinde işbu târîh-i i‘lâm senesi Muharremi’nin on yedinci günü mahmiye-i İstanbul’da Büyük Langa kurbünde vâki‘ Meryem Ana kenîsesinde mâlımdan doksan aded Mısır zincirlisi altın ve iki buçuk cedîd guruş ki cem‘an bi-hesâb-ı guruş iki yüz elli guruş mesfûr Agob’a ikrâz ve teslîm etmiş idim, hâlâ taleb ederim deyü ba‘de’d-da‘vâ ve’l-inkâr müdde‘î-i mesfûr müdde‘âsını lede’t-tezkiye makbûlü’ş-şehâde oldukları zâhir olan Agob v. Kasber ve Makoz v. Ohan ve Serkiz v. Makos ve Kirkor v. Nehabet nâm zimmîler şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı mezbûr iki yüz elli guruşun edâsına mesfûr Agob’a tenbîh olunduğu huzûr-ı âlîlerine i‘lâm olundu. Fî 21 S sene 1153.