Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 499 Hüküm no: 652 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskicilerin sadece tamir işiyle uğraşıp ayakkabıcılar gibi dükkânlarında mest, çedik, papuç ve çizme satmaması Bâ-mühr-i efendi Ma‘rûz Mahmiye-i İstanbul’da Sultan Bayezid kurbünde Doğancıyân Arastası demekle ma‘rûf arastada olan haffâflar kethüdâsı es-Seyyid Osman b. Mehmed ve hırfet-i mezkûreden el-Hâc Mehmed b. Zeynelabidin ve Hâfız Mehmed b. el-Hâc Süleyman ve el-Hâc İbrahim b. Ömer ve sâir cerîdede isimleri mastûr kimesneler meclis-i şer‘de hırfet-i mezkûreye mülhak olan eskici tâifesinden Andriyas ve Kör Haçador ve Serkiz ve sâir mazbûtü’l-esâmî zimmîler muvâcehelerinde bundan akdem mesfûrûn ve sâir eskici tâifesi Parmakkapı etrâfında ve sâir mahallerde dekâkîn tahtlarında ber-mu‘tâd-ı kadîm kendi metâ‘ları olan eski ve müsta‘mel mest ve çedik ve papuç ve çizme ta‘mîr ü termîm ve bey‘ ü şirâ edip bu vechile nizâm verilmiş iken kanâ‘at etmeyip bir iki seneden berü ol mevzi‘lerin üzerlerine hilâf-ı nizâm haffâflar gibi dekâkîn ihdâs ve bey‘ ü şirâsı bize mahsûs ve mu‘ayyen olan nâ-müsta‘mel cedîd mest ve çedik ve papuç ve çizmeyi bey‘ ü şirâ edip nizâmımızın ihtilâline bâ‘is ü bâdî olmuşlardır deyü teşekkî ve fîmâ-ba‘d vech-i meşrûh üzere kendülere mahsûs ve mu‘ayyen olan metâ‘larını ta‘mîr ü termîm ve bey‘ ü şirâ edip arastaya mahsûs ve mu‘ayyen olan nâ-müsta‘mel cedîd mest ve çedik ve papuç ve çizme bey‘ ü şirâ‘ etmeyip nizâm-ı kadîmî muhil hareketden eskici tâifesi men‘ ü def‘ olmak bâbında fermân-ı âlî iltimâs eyledikleri huzûr-ı âlîlerine i‘lâm olundu. Fî 9 S sene 1153.