Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 500 Hüküm no: 654 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İhtida etmiş olan on kişinin elek ve kalbur imal ettikleri ve Kıbtî taifesinden olmadıkları Bâ-mühr-i efendi Ma‘rûz Sâdır olan fermân-ı şerîfe imtisâlen ashâb-ı arzuhâl Ahmed b. Ali ve Ali b. el-Hâc Musli ve Musa Çorbacı b. Ali ve Yusuf b. el-Hâc Mehmed ve el-Hâc Hüseyin b. Ahmed ve el-Hâc Mehmed b. el-Hâc Musli ve Hasan b. Ali ve İbrahim b. Abdullah ve Ahmed b. Mehmed ve Hüseyin b. İbrahim cem‘an on nefer kimesneler mahmiye-i İstanbul’da Topkapısı dâhilinde Bayezid mahallesinde vâki‘ Haremeyn-i şerîfeyn Evkāfı’ndan menâzilde sâkinler olmağla ahvâllerin ihbâr için mahalle-i mezbûre imâmı İbrahim Efendi ve müezzin Molla Halil Halîfe ve ahâlîden mazbûtü’l-esâmî yedi nefer Müslimîn ve civârında vâki‘ Fâtıma Hatun mahallesi imâmı Ahmed Efendi ahâlîden müseccelü’l-esâmî sekiz nefer kimesneler ve Saray-ı cedîd-i sultânî aşcılarından Ali Bey b. Mehmed ve Mehmed Bey b. İbrahim ve Ali Bey b. Osman ve Ahmed Bey b. Hasan ve Mehmed b. İsa ve Ahmed b. Mehmed nâm kimesneler meclis-i şer‘a hâzırûn olup istintâk olunduklarında şöyle haber verdiler ki, bâlâda zikr olunan on nefer kimesnelerin babaları Ermeni tâifesinden olup şeref-i İslâmla müşerref ve kırk elli seneden berü zikri sebk eden Bayezid Ağa mahallesinde sâkinler olup Saray-ı cedîdde vâki‘ hâs fırın ve harcî fırın ve matbah-ı hâs ve Beykoz’da vâki‘ mîrî değirmene lâzım olan elek ve kalburu bunlar işleyip babaları ve kendileri Kıbtî oldukları ve maktû‘ verdikleri ma‘lûmumuz değildir deyü her biri ihbâr ve mezbûrdan fîmâ-ba‘d kendi hallerinde olup kemâ-fi’l-evvel yine zikr olunan Bayezid mahallesinde sâkinler olmak üzere fermân-ı âlî iltimâs eyledikleri huzûr-ı âlîlerine i‘lâm olundu. Fî 20 S sene 1153.