Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 501 Hüküm no: 655 Orijinal metin no: [77a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Mustafa’nın satılan eşyalarından diğer varislerin hakkının ödenmesi Bâ-mühr-i efendi Ma‘rûz Arzuhâl sâhibeleri Halime ve Hadîce ve Ümmühani nâm hatunlar zâtları ba‘de’t-ta‘rîfi’ş-şer‘î dîvân-ı hazret-i sadrazamîde ma‘kūd-ı meclis-i şer‘de karındaşları Zekeriya nâm kimesne mahzarında mezbûr Zekeriya dört sene mukaddem vefât eden babamız Şerbetçi Mustafa’nın cümle terekesinden bir bâb şerbetçi dükkânında işbu yedimizde olan defter nâtık olduğu üzere bin doksan guruş kıymetli eşyâsın ahz u kabz ve istihlâk etmekle bundan akdem meblağ-ı mezbûrdan bi’l-farîzati’ş-şer‘iyye bizlere isâbet eden beş yüz seksen beş guruşu tarîkı’z-zamân mezbûrdan taleb ve da‘vâ ve ba‘de’l-inkâr müdde‘âmızı şuhûd-ı udûl ile isbât ve edâsıyla ve yedimize arzuhâl hâmişine tahrîr olunan i‘lâm verilmiş idi, hâlâ mezbûr Zekeriya’dan meblağ-ı mezbûru taleb ederiz deyü da‘vâ ol dahi cevâbında i‘lâm-ı mezkûrun bi’l-cümle mantûkunu ve mezbûrânın kelimât-ı meşrûhalarını vicâhen tasdîk ve şifâhen tahkīk etmekle mezbûr Zekeriya meblağ-ı mahkûmun-bihi edâ ile ilzâm olunduğu huzûr-ı âlîlerine i‘lâm olundu. Fî 21 S sene 1153.