Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 501 Hüküm no: 656 Orijinal metin no: [77a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail’in vekalet iddiasının doğru olmadığı Ma‘rûz Anadolu’da Divriği kazâsına tâbi‘ Dimisi nâm karye sâkinlerinden olup bundan akdem katîlen vefât eden Hüseyin b. Mehmed b. Mehmed b. Hüseyin’in babası merkūm Mehmed tarafından ber-vech-i âtî vekâlet iddi‘â eden derûn-ı arzuhâlde mezkûr İsmail Mahkeme-i Bâb’da meclis-i şer‘de sâhib-i arzuhâl Musli b. Zülfikar mahzarında târîh-i i‘lâmdan üç sene mukaddem merkūm Mehmed’in oğlu müteveffâ-yı mezbûr Hüseyin’i karye-i mezbûrede merkūm Musli piştov ta‘bîr olunur tüfenk ile sol böğründen bi-gayr-ı hakkın darb ve cerh ve ol anda müteessiren vefât etmekle merkūm Mehmed mezbûr Musli’den ber-vech-i muharrer müdde‘âsına beni vekîl eyledi deyü huzûr-ı şer‘a ikāmet eylediği şâhidleri ber-minvâl-i muharrer edâ-i şehâdet edemeyip ve merkūm İsmail’in tasaddî eylediği vekâlet da‘vâsı mutlakā mezbûr Musli’den celb-i mâl etmek üzere ve ta‘cîz ve tezvîrât olduğu mezbûr Musli’yi mahkeme be-mahkeme gezdirip her vardığı mahkemede bir dürlü da‘vâya tasaddî eylediğinden zâhir ve nümâyân olduğundan mâ‘adâ husûs-ı mezkûru mahallinde görmek üzere merkūm Musli’nin yedine emr-i âlî i‘tâ olunmağın ber-mûceb-i emr-i âlî husûs-ı mezkûruna mahallinde görülmesi bâbında mezbûr Musli müekked emr-i âlî iltimâs eylediği huzûr-ı âlîlerine i‘lâm olundu. Fî 22 S sene 1153.