Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 502 Hüküm no: 657 Orijinal metin no: [77a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Odabaşı’nın borcunu kefillerinin ödemesi Ma‘rûz Dergâh-ı âlî yeniçerilerinin altmış yedi cemâ‘ate mahsûs odanın nukūd-ı mevkūfesine bi’l-fi‘il mütevellî olan sâhib-i arzuhâl Halil Odabaşı meclis-i şer‘de derûn-ı arzuhâlde isimleri mezkûr es-Seyyid Hüseyin ve Feyzullah nâm kimesneler muvâcehelerinde bundan akdem fevt olan Ali Odabaşı b. el-Hâc Abdullah b. el-Hâc Mehmed zimmetinde karz-ı şer‘î olmak üzere mâl-ı vakf-ı mezbûrdan ber-mûceb-i temessük iki yüz elli guruşa mezbûrân es-Seyyid Hüseyin ve Feyzullah kefîl olup ve her biri âharın zimmetine lâzım gelen meblağa dahi kefîl olmağın meblağ-ı mezbûru merkūmândan bi’t-tevliye taleb ederim deyü ba‘de’d-da‘vâ ve’l-inkâr mütevellî-yi mezbûr ber-vech-i muharrer müdde‘âsını dört şâhid-i adl ile mezbûrân es-Seyyid Hüseyin ve Feyzullah muvâcehelerinde vech-i şer‘î üzere isbât etmeğin mûcebince meblağ-ı mezbûr iki [yüz] elli guruşun edâsıyla merkūmân es-Seyyid Hüseyin ve Feyzullah ilzâm olundukları huzûr-ı âlîlerine i‘lâm olundu. Fî 24 S sene 1153.