Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 502 Hüküm no: 658 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın Mehmed’in hamile gelininin düşük yapmasına sebep olduğu iddiasıyla Mehmed’in açtığı davanın kabul edilmediği Ma‘rûz Mumcu Halil Beşe mübâşeretiyle Bâb mahkeme[sinde] ihzâr olunan es-Seyyid Osman Ağa’nın hasmı es-Seyyid Mehmed meclis-i şer‘de mezbûr es-Seyyid Osman Ağa mahzarında mezbûr es-Seyyid Osman Ağa târîh-i i‘lâmdan iki ay mukaddem vilâyet-i Anadolu’da Anduğu kazâsına tâbi‘ Ortaköy’de sâkin Salih Ağa karındaşı ismi ma‘lûmum olmayan bir kimesne için mezbûr es-Seyyid Osman Konya vâlisi tarafından on beş neferâtlı mübâşir getirip izn-i hâkimü’ş-şer‘le benim menzilimi konak verip neferât-ı merkūme beni bi-gayr-ı [hakkın] darb eylediklerinden mâ‘adâ gāib ani’l-beled oğlum Nuh’un zevcesi Râbia nâm hatun dahi havfından nâşi vaz‘-ı haml etmekle mezbûr es-Seyyid Osman Ağa’dan mûcebini taleb ederim deyü tasaddî eylediği da‘vâsı takrîr üzere mezbûr es-Seyyid Osman Ağa’dan meşrû‘ olmayıp mezbûr es-Seyyid Osman Ağa’ya suâl dahi teveccüh etmemeğin mûcebince müdde‘î-i mezbûr es-Seyyid Nuh bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 24 S sene 1153.